Turqia arrestoi 16 xhihadistë të dyshuar të Frontit Al-Nosra, dega siriane e Al-Kaedës, gjatë një operacioni të gjerë të policisë në lindje të vendit, bëri sot të ditur agjencia zyrtare tyrke e lajmeve, Anadolu Agency.
”Të dyshuarit u arrestuan gjatë një ofensive bastisjesh në rajonin Adiyaman, duke vënë në shënjestër persona të dyshuar që kanë lidhje me sulmet në Siri”, shtoi agjencia e lajmeve pa dhënë detaje të mëtejshme, veçanërisht për kombësinë e tyre.
Fronti Al-Nosra është një grup xhihadist i sprovuar me luftimet, i mirorganizuar dhe aleat me rebelimin anti-Assad. Ai u shfaq zyrtarisht në janarin e vitit 2012, ose më saktë 10 muaj pas fillimit të revoltës paqësore kundër regjimit të Bashar al-Assad-it, që u shtyp me anë të sulmeve të përgjakshme.
Kjo është hera e parë që Turqia bën publik lajmin e arrestimit të të dyshuarve që i përkasin këtij grupi xhihadist në territorin e saj.
