Nga kultivimi i bimës narkotike të hashashit në Lazarat, dyshohet se furnizohej një pjesë e madhe edhe e tregut kosovar. Por, ndërhyrja e shtetit shqiptar dhe shkatërrimi i këtij “oazi” të kultivimit të drogës, ka bërë që mungesa e hashashit dhe ngritja e çmimit të tij në tregun kosovarë të jetë shumë e theksuar.
Sipas mediave kosovare rënia e Lazaratit e ka bërë më të vështirë sigurimin e substancës narkotike për konsumatorët.
“Ndërhyrja e policisë së Shqipërisë në Lazarat ka ndikuar në çmim në masë të madhe. Mirëpo, në përdorim aspak, sepse varësia ndaj substancave narkotike nuk njeh moshë, racë, gjini, fe, e as edhe çmim!”, shprehet një përdorues për lajmi.net.
Ai tregon se kjo situatë ka bërë që çmimi i hashashit të ngrihet deri në masën 500 %.
“Nëse e masim me kg, nga 700-900 euro sa ka kushtuar më herët, tani kushton 3000 deri në 5000 euro, varet nga lloji”. tregon ai
Ndërsa, i pyetur se nga vejnë ky lloj i drogës, pas “paralizimit” të Lazaratit, ai thotë se sërish Shqipëria ngelet furnizuesi kryesor, por një pjesë edhe nga kultivues vendor.
