Forcat Speciale RENEA kanë zhvilluar kontrolle blic gjatë ditës së sotme në zonën e Fushë Krujës në kërkim të autorëve të dyshuar të ekzekutimit mafioz të Shkëlzen Kastratit më 1 shkurt në rrethrrotullimin e Sheqit në Fier.
Kontrollet janë kryer në disa shtëpi dhe biznese me qëllim kapjen e personave të dyshuar apo gjetjen e provave për persona të implikuar në këtë vrasje.
Gjithçka ndodhi pasi policia identifikoi një makinë “Audi” që dyshohet se është përdorur në krim, pronari i së cilës rezulton të jetë nga zona e Fushë-Krujës.
Nisur nga këto rrethana dhe të dhëna të tjera, policia dyshon se ekzekutorët e Shkëlzen Kastratit janë vrasës me pagesë nga zona e Fushë-Krujës.
Deri më tani janë shoqëruar 7 persona të cilët mund të kenë dijeni për ngjarjen e gjetjen e autorëve, ndërsa 2 persona janë shpallur në kërkim, për të dhënë dëshmitë e tyre.
Një prej dy personave të shpallur në kërkim mësohet se është edhe pronari i “Audi”-t që u gjet në Kamëz, me të cilin mendohet se janë larguar autorët. Po të njëjtat burime kanë saktësuar se për ngjarjen kanë dëshmuar edhe dëshmitarë okularë të cilët kanë parë largimin e mjetit “Range Rover” nga rotondo-ja e Sheqit, vendi ku ndodhi ngjarja, e deri në “Mbikalimin e Baltëzës”, aty ku mjeti brenda të cilit ishte edhe arma e krimit, u dogj.
Madje në momentin kur autori i ka vënë flakën makinës dhe është larguar drejt automjetit që e priste mbi “by-pass”-in, në sallën operative është bërë edhe një telefonatë ku është thënë se një makine i është vënë flaka në këmbët e urës së “by-pass”-it, dhe një i ri ishte ngjitur me shpejtësi drejt rrugës, nga ku dhe është larguar.
g.kosovari
