Renato Cepa, 49-vjeçari nga Korça, identiteti i të cilit u përdor nga Arben Frroku në Holandë, ka mohuar kategorikisht se ka njohje me të akuzuarin. I intervistuar nga Gazeta Shqiptare, Cepa sqaron se nuk ka asnjë dijeni për vjedhjen e identitetit të tij dhe ka hedhur poshtë të gjitha shpifjet e dala në disa media ku është përfolur se ai është shpallur në kërkim nga policia e Korçës. “Unë nuk kam asnjë lloj lidhjeje shoqërore apo fisnore me atë person. Kam më se një javë që dëgjoj emrin tim të përmendet në media dhe kjo më ka shqetësuar shumë mua dhe familjen time. Më duket sikur e kam bërë unë atë krim kur dëgjoj emrin tim në media. E theksoj që nuk e njoh atë person dhe nuk e di si e ka vjedhur identitetin tim, s’kam asnjë dijeni. Se si e ka marrë identitetin, le ta zbulojnë organet kompetente. Unë dua të mos përmendet më emri im, pasi kam fëmijë dhe janë shqetësuar shumë”, thotë Cepa.
Babai i tre fëmijëve, ka pohuar se nuk është larguar asnjëherë nga banesa e tij, madje është i gatshëm dhe në dispozicion të policisë dhe prokurorisë, ndonëse këto nuk e kanë thirrur për ta pyetur.
Ai ndodhet gjatë gjithë kohës në qendër të qytetit të Korçës, ku punon në lokalin e tij, dhe kjo është lehtësisht e verifikueshme.
BW/d.i.
