Themeluesi i Huawei Ren Zhengfei ka mbetur sfidues ndaj lëvizjeve të SHBA kundër kompanisë së tij, duke thënë se SHBA “nënvlerëson” aftësitë e saj.
Duke folur për mediat shtetërore kineze, Ren minimizoi ndikimin e sanksioneve të fundit të SHBA dhe tha se askush nuk mund të arrijë deri në teknologjinë e tij 5G në të ardhmen e afërt.
Javën e kaluar, SHBA shtoi Huawei në një listë të kompanive që firmat amerikane nuk mund të tregtojnë nëse nuk kanë licencë.
Ky veprim shënoi një përshkallëzim në përpjekjet amerikane për të bllokuar kompaninë kineze.
Qindra e miliona përdorues “smartphone”-sh u preken nga vendimi i “Google” për të prerë lidhjet e sistemit të tij operativ “Android” me prodhuesin kinez “Huawei”.
Vendimi, që vjen në mesin e një lufte të vërtetë tregtare mes Shteteve të Bashkuara dhe Kinës, do të thotë që përdoruesit e “Huawei”-t të fillojnë të humbasin qasjen në shërbimet në pronësinë e “Google”, si “Gmail” dhe “Google Maps”, e të përjashtohen nga përditësimet e ardhshme të “Android”-it në telefonët e tyre.
Lëvizja nga gjiganti kalifornian i internetit në frontin e programeve është shoqëruar edhe nga lajmi që prodhuesit amerikanë të “chip”-eve nuk e furnizojnë më “Huawei”-n, duke dëmtuar edhe aspektin “hardware” për telefonët e tij.
“Me telefonin nuk mund të instalosh më aplikacione të reja. Pra, unë tani do të kem një telefon me funksionet e telefonit, por me më pak funksione të një smartphone”, tha Will Riofrio.
“Njerëzit që kanë një telefon Huawei sot preken më pak sesa versionet e ardhshme, sepse mbi ata telefonë në prodhim do të aplikohen kufizimet e reja në total”, tha Aubin de Sousa.
“Huawei” ka shitur rreth 203 milionë telefonë vitin e shkuar dhe 150 milionë në vitin 2017, duke lënë pas “Apple”-n dhe duke kërcënuar madje edhe qenien e “Samsung”-ut në krye të klasifikimeve globale.
Për tremujorin e parë të vitit 2019, para përplasjes me administratën “Trump”, “Huawei” kishte shitur rreth 59 milionë telefonë. Të gjithë këta përdorues rrezikojnë tani të humbasin qasjen te përditësimet e rëndësishme të “Android”-it që do të lëshojë “Google” në të ardhmen, edhe pse për momentin do të vazhdojnë të kenë përditësimet e sigurisë.
g.kosovari
