Gjykata e Tiranës ka dhënë masën e sigurisë “arrest me burg” për 43-vjeçaren Lubjana Gjecaj, e cila është e dënuar në Itali për terrorizëm.
Para togave të zeza 43-vjeçarja ka thënë se ka dashur që të vuajë dënimin në Itali, por nuk është lejuar nga shteti italian. Ajo ka theksuar se do të bëjë një kërkesë që dënimin ta vuajë në Shqipëri, jo në Itali.
“Kam djeni për dënimin ndaj meje në Itali. Kam dashur të shkoj për të vuajtur dënimin, por nuk më ka lejuar shteti italian. Do të bëj kërkesë që të vuaj dënimin këtu”, mësohet të ketë thënë ajo para togave të zeza.
Lubjana Gjeçaj, nëna e 3 fëmijëve dyshohet si pjesë e një celule terrori që rekrutonte vajza për t’i martuar me luftëtarët e ISIS.
43-vjeçarja, pas kthimit nga Italia, ishte vendosur në zonën e Unazë së Madhe në Tiranë, ku jetonte me fëmijët e saj të mitur, ndërsa ishte shtëpiake.
Nga hetimet e kryera nga policia italiane, në bashkëpunim me atë shqiptare, Gjeçaj, ishte pjesë e bandës që u arrestua në korrik të 2015-ës, në kuadër të operacionit ‘Martesa’ që u zhvillua në Itali, Lushnjë, dhe Kanada. Thuhet se grupi terrorist në fjalë, gjente të rinj dhe i martonte ata në Turqi, e më pas i dërgonte ushtarë pranë ISIS. Tashmë pritet ekstradimi i 43-vjeçares drejt shtetit italian.
g.kosovari
