Në një alarm shqetësues, Organizata e Kombeve të Bashkuara raporton se 383 punonjës humanitarë u vranë në vitin 2024, shifër që përfaqëson një rritje prej 31% krahasuar me një vit më parë.
Organizata paralajmëron se bilanci për këtë vit mund të jetë po aq i rëndë, për shkak të konflikteve të vazhdueshme në Gazë, ku janë vrarë 181 punëtorë, dhe në Sudan, me 60 viktima të tjera.
OKB-ja thekson se përgjegjësit kryesorë të këtyre vrasjeve janë aktorët shtetërorë dhe se shumica e viktimave ishin staf vendor, të sulmuar gjatë kryerjes së detyrave ose në shtëpitë e tyre.
Përveç të vrarëve, në vitin 2024:
-308 punëtorë humanitarë u plagosën
-125 u rrëmbyen
-45 u ndaluan
Tom Fletcher, shefi i ndihmës së OKB-së, deklaroi: “Edhe një sulm ndaj një kolegu humanitar është një sulm ndaj të gjithëve neve dhe ndaj njerëzve që ne shërbejmë. Dhuna ndaj punëtorëve të ndihmës nuk është e pashmangshme. Ajo duhet të marrë fund.”
Sipas të dhënave paraprake, deri më 14 gusht të këtij viti, 265 punëtorë humanitarë janë vrarë, sipas Bazës së të Dhënave për Sigurinë e Punëtorëve të Ndihmës.
Organizata Botërore e Shëndetësisë raporton gjithashtu mbi 800 sulme ndaj punëtorëve shëndetësorë në 16 territore, me mbi 1,110 viktima dhe qindra të plagosur. OKB-ja thekson se sulmet e tilla shkelin të drejtën humanitare ndërkombëtare dhe kërcënojnë linjat jetike që mbajnë gjallë miliona njerëz në zona lufte dhe fatkeqësie.
Dita Botërore Humanitare përkujton ngjarjen e 19 gushtit 2003, kur Sergio Vieira de Mello, shef i të drejtave të njeriut në OKB, dhe 21 punëtorë të tjerë humbën jetën pas një shpërthimi në selinë e OKB-së në Bagdad.
