Komisioni Europian vlerëson me nota jo shumë pozitive nivelin e përgatitjes së Shqipërisë në drejtim të prokurimeve publike.
Kjo notë është nën atë që i jepet Shqipërisë në tërësi dhe ekonomisë së vendit, ku niveli i përgatitjes vlerësohet si i moderuar.
Kështu, në progres raportin që i është dorëzuar qeverisë shqiptare thuhet shprehimisht se, në drejtim të prokurimeve publike, pra tenderave apo kontratave koncesionare, duhen bërë më shumë përpjekje për të përmirësuar procedurat si dhe për të parandaluar korrupsionin gjatë fazës së prokurimit.
Komisioni Europian radhit kështu 3 pika kyçe ku duhet bërë progres në mënyrë që vendi ynë t`i ngjajë atyre europiane në këtë drejtim.
Së pari duhen implementuar në tërësi direktivat europiane të 2014-ës.
Së dyti, duhen forcuar kapacitetet administrative të Agjencisë së Prokurimeve Publike dhe atë të autoriteteve kontraktuese.
Së treti, të forcohen kapacitetet audituese të shtetit si dhe të ndiqen periodikisht rastet e konfliktit të interesit.
Në këtë mënyrë, Komisioni Europian vlerëson se, procedurat aktuale kanë mangësi të konsiderueshme në të gjitha fazat, por kryesisht në atë të tenderimit dhe atë të menaxhimit në rastin e koncesioneve./a.m.
