Kryetari i Partisë Bashkimi për të Drejtat e Njeriut Vangjel Dule kërkon rishikimin e pr/ligjit për për regjistrimin e adresave të emigrantëve. Ai e argumenton qëndrimin e tij me faktin se emigrantëve po u privohet në mënyrë të qëllimshme e drejta e votës.
“Pse kjo frikë nga vota e emigrantëve. Çdo qytetar i Republikës së Shqipërisë në bazë të legjislacionit, voton ku e ka banimin e tij të përhershëm. Në një moment që vendbanimin e ndryshon, regjistrohesh automatikisht në një vendin ku shkon. Ju po i privoni në mënyrë të qëllimshme emigrantët nga e drejta e votës. Rishikojeni, vonojeni dhe dy tre javë këtë ligj dhe silleni bashkë me reformën zgjedhore. Ti garantohet e drejta e votës emigrantëve, qoftë në formë postare apo krijimi i qendrave të votimit. Por ky ligj ashtu siç vjen sot, nuk vë vetulla, ky ligj po nxjerr sy. Çfarë ju rezervojmë ne emigrantëve? Që kur shkelin kufirin, fillojnë me radhë të gjata, kalojnë në postblloqet e policisë duke dhënë haraçin, e mendojnë dy dhe tre herë nëse do rikthehen pushimet e radhës të verës apo të dimrit. Në vend të shikoni këto aspekte, sillni një pr/ligj që në përmbajtjen vet është bosh, në mos dashakeqës në qëllimin e tij final”- tha kreu i PBDNJ Dule.
