Komisioni i Ligjeve miratoi vetëm me votat e shumicës projekt-ligjin për regjistrimin e emigrantëve. Ministri i Brendshëm, Saimir Tahiri theksoi se ky projekt-ligj do të nxjerrë nga errësira emigrantët dhe do të mundësojë votimin e shqiptarëve që jetojnë dhe punojnë jashtë vendit.
“Ky është një ligj themelor për mirëfunksionimin e shtetit”, theksoi ministri Tahiri.
Sipas këtij projekt-ligji, qeveria parashikon që brenda dy viteve çdo qytetar shqiptar që jeton jashtë kufijve të jetë i regjistruar.
Kryeministri Edi Rama e ka cilësuar një reformë historike, ku shteti do të marrë të gjitha përgjegjësitë, në raport me qytetarët, pavarësisht vendit ku jetojnë.
Sipas liderit të mazhorancës, procesi i regjistrimit të emigrantëve do t’i japë fund humbjes se kohës e parave, që shqiptarët shpenzojnë për të marrë qoftë edhe një dokument të vetëm, duke e krahasuar sjelljen e shtetit në 2 dekadat e fundit me sjelljen e regjimit komunist.
