Regjistrimet për në universitete të hapura edhe në fundjavë

Drejtoria e Komunikimit në Rektoratin e Universitetit të Tiranës nëpërmjet një komunikimi zyrtar njofton të gjithë maturantët e shpallur fitues në raundin e parë që të paraqiten pranë sekretarive mësimore përkatëse dhe të vazhdojnë procedurat për regjistrim edhe ditën e shtunë e të diel.

Ndërkaq, edhe ditën e djeshme, në fakultetet e Universitetit të Tiranës regjistrimet vazhdonin, ku përfaqësues nga Fakulteti i Shkencave Sociale bëjnë me dije se që prej datës 29 gusht deri mesditën e ditës së djeshme numri i studentëve që janë bërë pjesë e programeve të studimit në këtë fakultet ka arritur në 70.

Kur jeni fitues?

Aplikantët duhet të kenë kujdes dhe të verifikojnë në kohë reale në portalin ‘U-Albania’ renditjen e pikëve, klasifikimin dhe lirimin e hapësirave në degët që dëshirojnë. Në momentin që kandidati hyn në portalin ‘ualbania.arsimi.gov.al’ me kodin personal, i shfaqet tabela me programet e studimit ku ai ka aplikuar.

Në rastin kur dega ose degët shfaqen me ngjyrë të gjelbër, maturanti është fitues; kur shfaqen me ngjyrë të verdhë është një sinjalizim që tregon se kandidati është fitues për shkak të lirimit të kuotave, por që ende duhet pritur për azhornimin e listës. Vetëm në momentin që degët me ngjyrë të verdhë të kthehen me ngjyrë të gjelbër, maturanti do jetë fitues dhe mund të regjistrohet brenda afatit 48-orësh në sekretarinë mësimore, për të mos humbur të drejtën e studimit në atë program.

Të gjithë kandidatët, në bazë të udhëzimit të nxjerrë nga MAS, duhet të dinë që degët e shfaqura me ngjyrë të kuqe tregojnë se aplikanti nuk rezulton fitues në atë program studimi, sepse nuk ka arritur pikët minimale apo janë zënë të gjitha kuotat e paracaktuara në atë degë. Ndërsa në të gjitha ato raste kur programet e studimit shfaqen me ngjyrë gri do të thotë që maturanti nuk është fitues, pasi është përjashtuar nga kriteret e degës, është regjistruar në një program tjetër studimi, ose është përjashtuar pasi nuk ka bërë regjistrimin në kohë në degën e shpallur fituese.

Regjistrimi

Deri në datën 11 shtator do të vijojë procesi i regjistrimit të aplikantëve, çka shënon dhe përfundimin e raundit të parë. Në këtë interval kohor, lista e fituesve do të ketë ndryshime orë pas ore, ku një pjesë e maturantëve do të zgjedhin të regjistrohen në programin fitues të studimit, ndërkohë që pjesa tjetër do të presë lirimin e vendeve të reja.

Vlen të theksohet fakti që në momentin që një kandidat regjistrohet pranë sekretarisë përkatëse në një nga degët fituese, humb në këtë mënyrë mundësinë të regjistrohet në degët e tjera fituese. Në sistemin ‘online’ do i shfaqet me ngjyrë të gjelbër programi ku është regjistruar e me ngjyrë gri të gjitha degët e tjera fituese ose jo nga të cilat kandidati automatikisht është fshirë nga listat.

Raundi i dytë

Procedurat e aplikimit të raundit të dytë do të rifillojnë në periudhën 15-22 shtator 2017. Në këtë fazë do të kenë mundësi të aplikojnë të gjithë ata kandidatë që nuk kanë arritur të aplikojnë në raundin e parë; nuk janë shpallur fitues në asnjë degë edhe pse kanë aplikuar online; të gjithë ata që kanë aplikuar ‘online’, por s’kanë arritur të regjistrohen si dhe kandidatët që janë çregjistruar pas përfundimit të raundit të parë./g.sh/a.m.