Pasi Mikhail Benyash, avokat rus, tha se do të mbronte një grup rojesh kombëtare që refuzuan t’i bashkoheshin luftës në Ukrainë, ai u përmbyt me thirrje nga i gjithë vendi.
“Shumë njerëz nuk duan të luftojnë”, tha Benyash, i cili shtoi se rreth 1 mijë njerëz kishin qenë në kontakt me ekipin e tij, ndërsa ai ndjek çështjen e parë gjyqësore për të zbuluar zyrtarisht mospajtimin brenda radhëve të forcave të sigurisë ruse për pushtimin.
12 rojet kombëtare që u pushuan nga puna, pasi refuzuan të shkonin në Ukrainë ishin anëtarë të Rosgvardia, forcë e militarizuar e ndarë nga ushtria, për të ruajtur rendin publik dhe për të luftuar krimin.
Të arrestuarit argumentuan se urdhri ishte i paligjshëm, pasi ata nuk ishin ushtarë, por anëtarë të një force vendase, detyrat e të cilave nuk shtriheshin përtej Rusisë.
Ata nuk u informuan se ata po dërgoheshin në “territorin e Ukrainës për të marrë pjesë në një operacion të posaçëm ushtarak, për detyrat dhe kushtet e këtij operacioni dhe, si pasojë, nuk pranuan për të”, shtoi Benyash.
Rasti shton raportet e pakënaqësisë në rritje në të gjithë forcat ruse, me zyrtarët ushtarakë perëndimorë që tregojnë për moralin e ulët dhe aktet e supozuara të sabotimit.
Admirali Tony Radakin, oficeri më i lartë ushtarak i Mbretërisë së Bashkuar, këtë javë tha se kishte “shqetësim në të gjitha nivelet brenda forcave të armatosura të Rusisë”.
Rosgvardia shpesh shihet ndërkombëtarisht si “ushtria private” e presidentit Vladimir Putin, por në vend, roli i saj kryesor është të kontrollojë protestat. Forca është akuzuar për përdorimin e taktikave të rënda kundër aktivistëve të opozitës. Përgjegjësitë e Rosgvardia-s përfshijnë gjithashtu trajtimin e krimit të organizuar dhe terrorizmit.
Megjithatë, në pesë javë që nga pushtimi, automjetet dhe uniformat e tyre janë parë në disa video të filmuara në Ukrainë. Të paktën një video, e pakonfirmuar ende, tregonte një varg automjetesh të braktisura të Rosgvardia-s, helmeta dhe mburoja të tyre të shpërndara në dëborë.
Disa analistë perëndimorë besojnë se gardianët ka të ngjarë të jenë dërguar në Ukrainë jo për të vepruar si trupa të vijës së parë, por për të ndihmuar në pushtimin dhe shuarjen e protestave në qytetet ukrainase.
Por autoritetet e nënvlerësuan rezistencën ukrainase dhe shumë qytete mbetën terrene beteje në vend që të binin me shpejtësi nën kontrollin rus, duke lënë të ekspozuar gardistët kombëtarë.
Putin të mërkurën u dha tituj nderi disa anëtarëve të Rosgvardia të plagosur në luftime të rënda rreth Kievit – një pranim se gardianët ishin kapur me të vërtetë në aksionin e vijës së parë.
Por Benyash tha se punonjësit e Rosgvardia nuk ishin të trajnuar për operacione të plota luftarake.
“A janë trajnuar të hapin llogore? Për të ndërtuar struktura mbrojtëse?”, pyeti ai.
“Në linjën e tyre të punës ata përdorin armë të vogla. Maksimumi ata kanë armë të automatizuara, por në thelb nuk iu nevojitet t’i përdorin kurrë”, shtoi ai.
Disa komandantë të divizionit lokal të njësisë më të aftë për ushtri, të reagimit të shpejtë të njohur si SOBR janë vrarë. Funeralet e tyre u mbajtën muajin e kaluar në qytetin Vladimir të Rusisë.
“Divizioni Vladimir SOBR u themelua në vitin 1993 dhe gjatë 29 viteve të ekzistencës së tij, nuk pati viktima”, tha aktivisti Ilya Kosygin duke folur nga një vend jashtë Rusisë.
“Pastaj më 18 mars u mbajt një funeral për pothuajse të gjithë udhëheqjen e saj”.
Pasi Kosygin shkroi për incidentin në faqen e tij të internetit, ai mori mesazhe që kërcënonin sigurinë e tij dhe i premtonin se do ta raportonin te shërbimet e sigurisë. Faqja është bllokuar që atëherë nga mbikëqyrësi i mediave dhe komunikimeve të Rusisë.
Aktivisti tha se ndihej krenar, pasi dëgjoi se një grup trupash Rosgvardia po luftonin një betejë ligjore për urdhrin për të shkuar të shërbenin në Ukrainë.
“Ndoshta botimi im ka rol në këtë situatë”, tha ai.
Përpara seancës së radhës, avokati Benyash tha se nëntë nga 12 gardianët, që ngritën çështjen e shkarkimit gabimisht nga puna, i kishin tërhequr pretendimet nën presionin e madh. Ka pasur kërcënime për raste penale nëse nuk tërhiqen, tha ai.
“Disa po shohin të afërmit e tyre duke u larguar prej tyre”./m.j
