Kryetari i Grupit Parlamentar të LSI-së, Petrit Vasili në një prononcim për mediat ka prekur tre problematika kryesore, buxheti i vitit 2017, reforma zgjedhore dhe ligji për konçesionet. Kryetari i Grupit Parlamentar të LSI-së, Vasili i pyetur për buxhetin 2017, pohoi se, kemi diskutuar në grupin parlamentar kryesisht në linjat ku orientohet ky projektbuxhet i ri dhe se po e shikojmë me vëmendje dhe përgjegjësi. Vasili shtoi se “procesi i shqyrtimit duhet të shoqërohet me përmirësime dhe ekuilibrime të brendshme per ta bërë buxhet më efektiv dhe për objektivat që kanë lidhje me përmbylljen e mandatit 4-vjeçar”.
Ndërsa pyetjes për reformën zgjedhore, dhe qëndimin e Taulant Ballës në lidhje me listat e hapura, Vasili ju pergjigje se: “Tavolina e reformës zgjedhore është një tavolinë e rëndësishme e cila do të marrë në shqyrtim të gjitha opsionet për përmirësimin e mëtejshëm të Kodit Zgjedhor, por edhe të administrimit të zgjedhjeve. Rekomandimet e OSBE-ODIHR mbeten udhërrëfyes, të dy raportet, të 2013 dhe të 2015, dhe komisioni sigurisht është i hapur që të dëgjojë të gjitha propozimet”.
“Komisioni duhet të jetë i hapur për t’i dëgjuar , për të përmirësuar kualitetin e zgjedhjeve, kualitetin moral dhe kualitetin e përfaqësimit. Listat e hapura të propozuara nga ne, kanë patur qëllim, përmirësimin e kualitetit të përfaqësimit në nivelin më maksimal të tij. Besoj se ka qenë një iniciativë shumë e mirë dhe shumë pozitive”, theksoi Vasili.
Ndërsa i pyetur për çështjen e koncensioneve propozuar nga LSI, Vasili shtoi se “Është zhvilluar një mbledhje nga ky komision për dhënie mendimi në shqyrtim me grupet e interesit dhe jemi në pritje që të zhvillohet nje mbledhje përfundimtare për ta mbyllur Komisioni për Veprimtarinë Prodhuese si komision për dhënie mendimi. Pastaj menjëherë do të duhet të mblidhet Komisioni për ekonominë dhe Financat si komision përgjegjës për të bërë shqyrtimin e tij përfundimtar. Këtu nuk kam ndërmend të paragjykoj qëndrimin politik, votën e kolegëve, por si proces shqyrtimi besoj që duhet të ishte mbyllur”.
ma.me
