Kryetari i Partisë Republikane, Fatmir Mediu, ftoi në një tryeze të përbashkët të gjithë kryetarët e partive politike të djathta pjesë e koalicionit pjesëmarrës në zgjedhjet e fundit parlamentare, për të diskutuar në lidhje me reformën zgjedhore.
Garantimi i zgjedhjeve të lira dhe të ndershme ngelet qëllimi dhe angazhimi politik i gjithë këtyre partive. Në takim u shpreh vullneti për bashkëpunimin politik dhe elektoral të së djathtës në respektim të vlerave dhe kontributeve të të gjitha forcave politike. Po ashtu, në takim u ra dakort për qëndrimet mbi çështjet kryesore të reformës zgjedhore.
Në këtë takim u ra dakord që të ngrihet një grup i posaçëm teknik, i cili do të përgatisë dhe draftojë ndryshimet përkatëse duke ia paraqitur për diskutim PD-së dhe më pas komisionit të posaçëm të reformës zgjedhore.
Në takim u vendos që kjo tryeze të jetë e hapur edhe për subjektet e tjera politike të djathta. Në takim u ra dakort lidhur me aplikimin e sistemit proporcional dhe konkurimin me lista të hapura. Konkurimi me lista të hapura do të garantonte një Parlament të zgjedhur prej zgjedhësve shqiptarë dhe jo nga përcaktimet e krerëve të partive politike.
Po ashtu u vendos që procedura e votimit, vlerësimit dhe numërimit të votave të bëhet nëpërmjet sistemit elektronik në zbatim të kodit zgjedhor. “Implementimi i teknologjisë është shmangur në mënyrë të pajustifikuar dhe aktualisht përbën një detyrim të kodit zgjedhor”.
“Shteti shqiptar duhet të garantojë financim të fushatës eletorale për secilën parti politike, koalicion apo kandidat. Kjo do të shmangte kapjen e partive dhe qeverisjes nga paratë e korrupsionit apo interesat korruptive”, thuhet në deklaratën për shtyp të PR-së.
Tryeza në fjalë u zhvillua në ambientet e selisë së Partisë Republikane. Në fund të këtij takimi, pjesëmarrësit ranë dakord për zhvillimin e takimeve periodike deri në hartimin e një drafti të plotë përfundimar për ta propozuar më pas në komisionin e posaçëm për reformën zgjedhore.
