Kryetari i PD-së Lulzim Basha e cilësoi “të vdekur” marrëveshjen parazgjedhore me Edi Ramën. Por, duket se demokratët kanë dhënë shenja për bashkëpunim. PD kërkoi sot ngritjen e komisionit ad-hoc për reformën zgjedhore. Reforma zgjedhore ishte një prej pikave të marrëveshjes me Ramën dhe duket se të paktën për këtë pikë marrëveshja duket se do të “ringjallet”.
Pas mbeldhjes së grupit të PD, Edi Paloka nënkryetar i Partisë Demokratike bën me dije se elektronika është një pikë e panegociueshme.
“Reforma zgjedhore do të jetë fokusi kryesor i PD dhe grupit parlamentar. Menjëherë do bëjmë kërkesën për ngritjen e një komisoni ad hock për reformën zgjedhore, një komision i cili ndër të tjera do të ketë si pikë kryesore apo të rëndësishme votimin dhe numërimin elektronik”,- tha ai.
“Përveç kësaj ramë dakord që të thirren disa prej ministrave dhe të kërkohet informacion lidhur me strukturën e re të qeverisë, e cila duket qartazi që nuk është një strukturë që është ngritur për të funksionuar mirë qeveria, por një strukturë që siç e kemi thënë dhe në seancën e parë është ngritur vetëm me dy qëllime: Së pari tu gjejë punë ish-bllokmenëve dhe pinjollëve të bllokut, dhe së dyti të ketë një strukturë sa më të përshtatshme që paratë e shqiptarëve të kalojnë pa shumë problem nga ato të dy ministrave kryesor që do të kontrollojnë paratë e gjithë shqiptarëve, nga xhepat e tyre në xhepin e Edi Ramës”,- shtoi Paloka./a.m.
