Kryetari i Lëvizjes Socialiste Ilir Meta ka dalë me propozime konkrete sa i takon reformës zgjedhore.
Sipas Metës, është e nevojshme të ulet numri i deputetëve, pra mos të jenë 140 sa janë aktualisht por më pak.
“Këto janë probleme që kanë të bëjnë me detyrimin e forcave politike dhe duhet vullnet për ti zgjidhur. Duhet parë edhe numri i deputetëve pasi është më i madh se ç’duhet. Ne bëmë një reformë administrative dhe nga 400 njësi kaluam në 61 njësi. Duhet parë edhe numri i deputetëve”, tha Meta.
Këtë deklaratë ai e bëri gjatë një tryeze të organizuar nga Komisioni Qëndror i Zgjedhjeve, ku foli edhe për kufizimin e numrit të deputetëve biznesmenë.
“Ne do ta kemi në konsideratë kufizimin e biznesmenëve në parlament. Ky është një problem në cilësinë e Parlamentit dhe kjo është e dukshme. Nuk ndihmon as cilësinë e ligjbërjes, nuk ndihmon as rritjen e kontrollit të Kuvendit mbi Qeverinë, por shpesh ndikon mbi presionet që i bëhen Qeverisë dhe forcave politike për interesa të ngushta”, tha Meta./a.m.
