Deputeti i Partisë Socialiste, Koço Kokdhima duket se nuk i ka gëlltitur lehtazi kritikat në Kongres të Sekretarit të Përgjithshëm socialist Gramoz Ruçi, I cili kritikoi indirekt Kokdhimën se më shumë se organizim p bën çorganizim në Jug të vendit. Por Kokdhima, pak minuta para hyrjes në mbledhjen e grupit të PS-së u shpreh se pavarësisht qëndrimeve të Ruçit, puna e tij ka gjetur mbështetje në bazë. “Reformë që ne kemi zhvilluar në parti është përkrahur gjerësisht edhe nga qytetarët e rajonit”, u shpreh Kokdhima. Nga ana tjetër ai ka sqaruar edhe pozicionin e tij në lidhje zgjedhjen me votim si anëtar i Asamblesë së PS-së, e cila u komentua si një lëvizje për t’i paraprirë heqjes së mandatit nga Gjykata Kushtetuese.
“Nuk ia kam hequr askujt mundësinë sepse është një e drejtë statutore, e interpretuar edhe nga Komisioni i Garancive, që në qoftë se një funksionar politik do të konfirmojë me votë vendin e tij, kjo është e lejuar. Unë do mbetesha anëtar në të gjitha funksionet edhe nëse ma hiqte kushtetuesja mandatin”, komentoi deputeti socialist.
Sipas tij “është bërë shumë e qartë për të gjithë njerëzit që e gjithë kjo fushatë që lidhet me mandatin tim është tërësisht politike. Te unë nuk ka asnjë shkelje ligji apo rregulloreje. Marrëveshjet që ka bërë kompania ime, janë bërë para se unë të bëhesha deputet”.
