Presidenti i Republikës, Bujar Nishani priti një delegacion të Komisionit të Venecias, me të cilët zhvilloi një takim pune në kuadër të përgatitjes së opinionit të tyre mbi reformën në drejtësi.
Gjatë bashkëbisedimit me ekspertët Kreu i Shtetit theksoi se reforma në sistemin e drejtësisë përbën një objektiv parësor dhe thelbësor në tërësinë e reformave të thella që ka ndërmarrë vendi ynë në përmbushje të aspiratës integruese si vend kandidat i Bashkimit Evropian.
“Reforma në drejtësi duhet të jetë gjithëpërfshirëse, e efektshme dhe afatgjatë duke iu nënshtruar një diskutimi të gjerë e të detajuar publik me mendimet dhe sugjerimet e të gjithë aktorëve dhe grupeve të interesit, shoqërisë civile dhe ekspertëve të pavarur ligjorë”-tha Nishani.
Një prej temave kryesore të bashkëbisedimit midis presidentit dhe ekspertëve të Komisionit të Venecias, ishte edhe lufta kundër korrupsionit në drejtësi dhe reformimi thelbësor i sistemit gjyqësor.
Ekspertët e Komisionit të Venecias nënvizuan rëndësinë e jashtëzakonshme të realizimit të reformës në drejtësi dhe plotësimit të kritereve të nevojshme sipas standardeve më të mira të Bashkimit Evropian.
