Konflikt i ri në horizont, ndoshta edhe përfundimtar, mes opozitës shqiptare dhe Perëndimit, për zbatimin e Reformës në Drejtësi. Pas vijave të kuqe, kundërshtive dhe nervozizimit për shtatë ligjet prioritare, Partia Demokratike dhe përfaqësuesit e SHBA-BE në Tiranë, duket se do të shkojnë drejt një përplasjeje përfundimtare për paketën e plotë të ligjeve, të cilat do të mundësojnë zbatimin e Reformës në Drejtësi në Shqipëri. Bëhet fjalë për draftet dhe ndryshimet bazë në kuadër të luftës kundër korrupsionit në nivele të larta.
Burime zyrtare pranë misionit EURALIUS në Tiranë, thanë për Shqiptarja.com se, mbi 130 ekspertë të Shteteve të Bashkuara të Amerikës, Bashkimit Evropian dhe shqiptarë kanë përfunduar hartimin e drafteve të reja dhe ndryshimin e ligjeve ekzistuese, sipas kalendarit dhe planit të veprimit për Reformën në Drejtësi. Bëhet fjalë për mbi 30 ligje, të cilat do të depozitohen në komisionin për Reformën në Drejtësi, një pjesë e të cilave janë zbardhur nga gazeta Shqiptarja.com.
shqiptarja.com/d.i.
