Pas protestës 20 minutëshe të qytetarëve në autostradën Lushnje-Fier, Autoriteti Rrugor Shqiptar ka vendosur të heqë nga kryqëzimi ‘Pushimi i shoferëve’ barrierat. Kjo zonë u vendos ditën e djeshme që të mbyllej pasi kërkesa ishte dhënë nga policia rrugore për shkak të aksidenteve të shumta që ndodhnin në zonë.
Qytetarët dolën në protestë ditën e sotme duke bllokuar aksin kryesor pasi atyre u shtohej dhe rreth 30 kilometra rrugë për të mbërritur në destinacion nga rrethrrotullimi i Kolonjës. Pas tre orësh, ARRSH vendosi që të largojë nga kryqëzimi barrierat.
“Pushimi i shoferit” prej kohësh ka shërbyer si nyjë lidhëse nga autostradë në drejtim të qytetit të Divjakës si dhe nga autostrada në njësitë administrative Krutje, Allkaj, Bubullimë, Fiershegan e më tej për në Kuçovë e Berat. Por tani pas bllokimit të saj nuk ka as një rrugë alternative.
g.kosovari
