Partia Socialiste ftoi të hënën anëtarësinë e saj që të bëhet pjesë e referendumit të 9 prillit, ku do të votohet për mandatin e kryetarit të ri të PS-së. Nënkryetari i grupit parlamentar socialist, Taulant Balla në një deklaratë për shtyp tha se referendumi përbën një ushtrim shumë të rëndësishëm demokratik, që PS e fut për herë të parë në jetën e partive politike në Shqipëri dhe që në të ardhmen synon ta përdorë edhe për çështje të tjera.
“Ndaj sot është i ftuar çdo anëtar i PS-së, që përmes votës së tij të bëhet pjesë e kësaj ngjarje, ku objektiv nuk është rezultati, por pjesëmarrja masive”, tha Balla.
“Referendumi i kësaj fundjave, përveçse një vendimmarrje e përbashkët për një çështje me rëndësi të veçantë, do të jetë edhe hapja e rrugës për përfshirjen e çdo anëtari të PS-së. Ky referendum do të ofrojë mundësinë që ata të thonë fjalën e tyre përfundimtare për një debat tonin të brendshëm”, u shpreh Balla.
