Kryeministri Edi Rama i është përgjigjur akuzave të opozitës se brenda spitaleve COVID nuk ka kapacitete pasi janë ezauruar të gjithë shtretërit duke publikuar mëngjesin e sotëm pamje nga brenda spitaleve COVID, duke zgjedhur kësaj herë ambientin e Sanatoriumit.
Sërish duke mos i kursyer fjalët ndaj opozitës, Rama shkruan se realiteti brenda spitaleve është njësoj siç edhe shfaqet në videot e publikuara nga kreu i qeverisë, duke i mohuar zërat që pretendojnë të kundërtën.
“Duan s’duan lehaqeniet e çakërdisura të opozitarizmit vulgar, agresiv, gënjeshtar, realiteti brenda spitaleve Covid është pa pikë dyshimi ai që keni parë këtu, e duke ju ftuar të shihni Pjesën e Tretë të EKSKLUZIVES, nga spitali Covid 2,”-shkruan Rama.
Ndërkohë drejtori i Spitalit Shefqet Ndroqi, Perlat Kapisizy, tha se në këtë spital ka edhe 30 shtretër kurse gjithsej janë 170 të shtruar deri më tani.
“Është një staf 470 punonjësish ku punojnë çdo ditë me ndërgjegje.As në ëndërr se kam menduar që do vijnë respiratore të tillë duke filluar që nga respiratorët donacion poor edhe ato të ardhur si rezultat i ndërhyrjes së qeverisë. Aktualisht kemi rreth 170 të shtruar, pra janë dhe 30 shtretër të lirë të cilët mund të përdoren. Kanë ardhur edhe monitorë jo vetëm respiratorë“, tha mjeku.
Deri më tani në Shqipëri janë shënuar 25801 persona të infektuar nga virusi, që nga rastet e para në mars. Nga të infektuarit kanë ndërruar jetë 590 pacientë.
g.kosovari
