“Nuk është i vërtetë lajmi se është sekuestruar kompleksi “Xheko Imperial”. Këto janë shpifje të atyre që duan të dëmtojnë imazhin e biznesit tim”.
Kështu shprehet pronari i “Xheko Imperial”, Agron Xheko rreth kompleksit në kryeqytet që njihet së shumti me emrin “Carslberg”. Ai konsiderohet si hoteli më luksoz në Tiranë, prapa godinës së presidencës.
Në një reagim të tij, Xheko hedh poshtë lajmet e sekuestrimit dhe nënvizon se ato janë thjesht spekulative.
“Shkrimet spekulative janë lajme që duan të dëmtojnë imazhin e biznesit. Në këtë kompleks që unë drejtoj janë 70 punonjës. Puna vazhdon normalisht”, thuhet në reagim.
Më herët, në media u përfol se godina lukzoze ishte sekuestruar prej një muaji nga përmbaruesi privat.
Kjo pasi, sipas medias, për të ndërtuar objektin biznesmeni kishte marrë kredi në disa banka të nivelit të dytë në Shqipëri dhe nuk i kishte shlyer.
