Ish-zëvendëskryeministrja teknike e PD, Ledina Mandija pas dorëzimit të dorëheqjes zhvilloi sot takime me përfaqësues të zyrës së Bashkimit Evropian në Shqipëri, zyrës së Këshillit të Evropës dhe OSBE-së të cilëve u dorëzoi edhe raportin e hartuar për zgjedhjet.
Përmes një njoftimi shpërndarë nga Mandija, thuhet se partnerët ndërkombëtarë e përgëzuan për punën e kryer gjatë drejtimit të Task-Forcës dhe për seriozitetin e pasqyrimit të të dhënave duke shpresuar që ky raport do të shërbejë për ndjekjen e mëtejshme të problematikës.
“Zgjedhjet e lira dhe të ndershme janë themeli i një sistemi demokratik dhe për këtë arsye Zëvendëskryeministrja shpreh besimin se ky raport është një pikë referimi për kryerjen e ndryshimeve të nevojshme në kuadrin ligjor me qëllim përmirësimin e standardit të zgjedhjeve dhe nxitjen e subjekteve zgjedhorë për të hequr dorë njëherë e mirë nga fenomeni i shëmtuar i shitblerjes se votës dhe përdorimit të elementëve dhe grupeve kriminale në zgjedhje” mbyllet njoftimi.
Mandija qëndoi për tre muaj në postin e zv/ kryeministres, por raporti i hartuar nga teknikët e PD u cilësia i njëanshëm nga Rama, ndërsa Basha akuzoi për sabotim nga kryeministri. /a.m.
