Presidenti i Shteteve të Bashkuara, Donald Trump, deklaroi se forcat amerikane kishin arrestuar homologun e tij venezuelian, Nicolás Maduro, pas një “sulmi në shkallë të gjerë” ndaj Venezuelës, ku shpërthime të fuqishme tronditën Karakasin dhe rajonin përreth në mes të natës.
Zëvendëspresidentja venezueliane tha se nuk e dinte vendndodhjen e Maduro dhe gruas së tij, duke kërkuar “prova jete” nga SHBA, ndërsa diplomacia amerikane shpalli një “epokë të re” për Venezuelën.
Ngjarja ka shkaktuar reagime të menjëhershme nga vende të ndryshme të botës.
Udhëheqësit në mbarë botën kanë reaguar pas sulmit në shkallë të gjerë të Shteteve të Bashkuara në kryeqytetin e Venezuelës, Karakas, duke shprehur shqetësim për përshkallëzimin e situatës dhe duke bërë thirrje për ulje tensionesh.
Presidenti i Këshillit Evropian, Antonio Costa, deklaroi se po e ndjek situatën me “shqetësim të madh”, duke theksuar se Bashkimi Evropian do të vazhdojë të mbështesë një zgjidhje paqësore, demokratike dhe gjithëpërfshirëse për Venezuelën.
Edhe presidentja e Komisionit Evropian, Ursula von der Leyen, u shpreh se BE-ja “qëndron pranë popullit të Venezuelës” dhe mbështet një tranzicion paqësor e demokratik, duke theksuar se çdo zgjidhje duhet të respektojë të drejtën ndërkombëtare dhe Kartën e OKB-së.
Kolumbia: “Sulm ndaj sovranitetit”
Presidenti kolumbian Gustavo Petro, një aleat i ngushtë i Maduros, denoncoi sulmin me raketa të SHBA-së ndaj Karakasit, duke e cilësuar si “sulm ndaj sovranitetit të Amerikës Latine”.
Ai paralajmëroi për një krizë humanitare dhe bëri thirrje për një takim urgjent të Organizatës së Shteteve Amerikane (OAS) dhe OKB-së për të diskutuar ligjshmërinë ndërkombëtare të veprimeve amerikane.
“Ata kanë sulmuar Venezuelën”, shkroi në llogarinë e tij në Twitter presidenti kolumbian.
Ai bëri thirrje për një takim “të menjëhershëm” të Organizatës së Shteteve Amerikane (OAS) dhe OKB-së për të vendosur mbi “ligjshmërinë ndërkombëtare” të këtij “agresioni” kundër vendit fqinj.
Rusia: “Akt agresioni të armatosur”
Ministria e Jashtme ruse e cilësoi ndërhyrjen amerikane si “akt agresioni të armatosur” dhe shprehu shqetësim të thellë, duke theksuar se “armiqësia ideologjike ka triumfuar mbi pragmatizmin ekonomik”.
“Këtë mëngjes, Shtetet e Bashkuara kryen një akt agresioni të armatosur kundër Venezuelës. Kjo është thellësisht shqetësuese dhe e dënueshme”, tha Ministria e Jashtme ruse në një deklaratë, duke shtuar se “armiqësia ideologjike ka triumfuar mbi pragmatizmin ekonomik”.
Irani: “Agresion i paligjshëm”
Ministria iraniane e Punëve të Jashtme dënoi fuqimisht sulmin amerikan, duke e cilësuar si shkelje flagrante të sovranitetit dhe integritetit territorial të Venezuelës. Teherani e quajti veprimin “agresion të paligjshëm” nga një armik i Republikës Islamike, duke rikujtuar lidhjet e ngushta mes dy vendeve.
Spanja: “Gati për ndërmjetësim”
Qeveria spanjolle bëri thirrje për ulje të tensioneve dhe përmbajtje, duke ofruar shërbimet e saj për të ndërmjetësuar një zgjidhje paqësore dhe të negociuar për krizën aktuale.
“Spanja bën thirrje për ulje të tensioneve dhe përmbajtje” dhe është “e gatshme të ofrojë shërbimet e saj të mira për të arritur një zgjidhje paqësore dhe të negociuar për krizën aktuale”, tha Ministria e Jashtme në një deklaratë.
Gjermania: “Situata mbetet e paqartë”
Ministria e Jashtme gjermane deklaroi se po ndjek nga afër zhvillimet në Venezuelë dhe është në kontakt të ngushtë me ambasadën në Karakas. Një celulë krize e qeverisë gjermane është mbledhur për të analizuar situatën, ndërsa raportohet se disa aspekte mbeten ende të paqarta.
“Po e ndjekim situatën në Venezuelë nga afër dhe po i kushtojmë vëmendje raporteve të fundit me shqetësim të madh. Ministria është në kontakt të ngushtë me ambasadën në Karakas. Situata mbetet e paqartë në disa aspekte. Celula e krizës e qeverisë gjermane po takohet sot në ministri”, tha Ministria e Jashtme gjermane.
Polonia: “Viti 2026 nis me krizë globale”
Kryeministri Donald Tusk tha se sulmi amerikan ndaj Venezuelës është një ngjarje që prek të gjithë botën. Ai paralajmëroi se viti 2026 ka nisur me një pengesë të madhe dhe se Polonia do të analizojë pasojat e këtij sulmi për rajonin dhe botën.
“Po dëshmojmë një sulm nga forcat amerikane kundër Karakasit, kryeqytetit të Venezuelës. Prandaj, viti 2026 po fillon me një pengesë të madhe. Do të kemi mundësinë të analizojmë pasojat e këtij sulmi mbi situatën në rajonin tonë. Një ngjarje si sulmi i sotëm i SHBA-së kundër Venezuelës prek të gjithë botën; ne do të reagojmë dhe do të përgatitemi për këtë situatë të re”, deklaroi kryeministri Donald Tusk në një konferencë për shtyp.
Italia: “Monitorim i vazhdueshëm”
Kryeministrja Giorgia Meloni po ndjek nga afër situatën dhe është në kontakt të vazhdueshëm me ministrin e Jashtëm Antonio Tajani, veçanërisht për të mbledhur informacion mbi qytetarët italianë në Venezuelë.
“Kryeministrja Giorgia Meloni po e monitoron nga afër situatën në Venezuelë dhe mbetet në kontakt të vazhdueshëm me Ministrin e Punëve të Jashtme dhe Bashkëpunimit Ndërkombëtar, Antonio Tajani, veçanërisht për të mbledhur informacion mbi qytetarët tanë”, sipas një deklarate nga zyra e Melonit.
Meksika: “Rrezik për stabilitetin rajonal”
Qeveria meksikane dënoi bombardimin e Venezuelës nga SHBA-të, duke paralajmëruar se çdo veprim ushtarak rrezikon seriozisht stabilitetin rajonal. Ministria e Jashtme e Meksikës e cilësoi ndërhyrjen si veprim të njëanshëm dhe të papranueshëm.
“Qeveria meksikane dënon dhe hedh poshtë në termat më të forta të mundshme veprimet ushtarake të kryera në mënyrë të njëanshme në orët e fundit nga forcat e armatosura të Shteteve të Bashkuara të Amerikës kundër objektivave të vendosura brenda territorit të Republikës Bolivariane të Venezuelës”, tha Ministria e Punëve të Jashtme në një deklaratë
Ministri i Jashtëm i Ukrainës, Andrii Sybiha, deklaroi se populli i Venezuelës meriton siguri, prosperitet dhe dinjitet njerëzor, duke kujtuar se Ukraina nuk e njeh legjitimitetin e Nicolas Maduros pas, siç i cilësoi ai, “zgjedhjeve të manipuluara dhe dhunës ndaj protestuesve”.
Ministrja e Jashtme e Suedisë, Maria Stenergard, tha se Stokholmi e ka bërë të qartë se Maduro nuk ka legjitimitet, por theksoi se respektimi i së drejtës ndërkombëtare është një përgjegjësi e të gjitha shteteve dhe një interes afatgjatë për sigurinë.
Ministria e Jashtme e Zvicrës bëri thirrje për ulje tensionesh, përmbajtje dhe respektim të së drejtës ndërkombëtare, duke shtuar se po monitoron nga afër situatën dhe se, deri tani, asnjë shtetas zviceran nuk është prekur nga sulmet.
Austria njoftoi se ka ngritur një ekip krize për sigurinë e qytetarëve të saj në Venezuelë, ndërsa paralajmërimi i udhëtimit mbetet në fuqi për të gjithë territorin e vendit.
Nga ana tjetër, Ministria e Jashtme e Çekisë theksoi nevojën për qetësimin e situatës dhe nisjen e negociatave diplomatike, përfshirë edhe opozitën venezueliane, duke e konsideruar prioritet sigurinë e qytetarëve çekë.
Presidentja e Kosovës, Vjosa Osmani, shprehu mbështetje të plotë për presidentin amerikan Donald Trump, duke deklaruar se “kur Amerika udhëheq, ne qëndrojmë së bashku”, pasi, sipas saj, liria kolektive varet prej saj.
Ndërkohë, Ministri i Jashtëm i Danimarkës, Lars Løkke Rasmussen, i cilësoi sulmet si një “zhvillim dramatik”, duke theksuar se duhet rikthyer dialogu dhe respektuar ligji ndërkombëtar.
