Deputeti i Listës Serbe në Kosovë, Nenad Rashiç, ka thënë se marrëdhëniet në mes të shqiptarëve dhe serbëve në Kosovë nuk kanë qenë kurrë me keq se tani dhe ka shtuar se duhet ndihma e ndërkombëtarëve për përmirësimin e tyre.
Për agjencinë e lajmeve serbe “Beta” në Serbi, Rashiç ka thënë se BE-ja në Kosovë është tërësisht pasive dhe se përfaqësuesit nuk po bëjnë asgjë në përmirësimin e marrëdhënieve në mes të shqiptarëve dhe serbëve në Kosovë, ku sipas tij, aktualisht gjendja është e keqe, transmeton Gazeta Express.
Ai ka thënë se jotoleranca e shqiptarëve dhe serbëve që janë të pranishëm në institucionet e Kosovës, ka krijuar një gjendje të tillë politike, por që komuniteti ndërkombëtar nuk po reagon.
Ai shtoi se do të jetë i vështirë riparimi i këtyre marrëdhënieve në qoftë se ndërkombëtarët nuk kanë ndonjë ide të përbashkët me shqiptarët dhe serbët e Kosovës për ta kapërcyer gjendjen aktuale.
“Deri më tani unë nuk shoh asnjë nga përfaqësuesit e bashkësisë ndërkombëtare që promovon multietnicitetin, si në demokracitë e tyre”, ka thënë Rashiç.
Ai ka thënë se përfaqësuesit e BE-së në Kosovë së fundmi janë tërësisht pasiv, citohet “GazetaExpress”. (b.an)
