“Qeverisë së Kosovës i mungon vullneti politik për përparim në integrimin evropian të vendit,” është shprehur raportuesja e Parlamentit Europian, Viola von Kramon në një intervistë për agjencinë bullgare të lajmeve, BTA.
Qeveria kosovare ka aplikuar për anëtarësim në Këshillin e Evropës dhe BE, por hapat e nevojshëm për përparim në këto aplikime nuk janë bërë, dhe sipas raportueses për Kosovën, “nëse dikush i di rregullat e klubit, duhet të luajë sipas atyre rregullave në vend që t’i shkelë ato”.
“Qeveria e Kosovës aktualisht nuk po e bën jetën më të lehtë për qytetarët, po dërgon sinjale shumë të përziera. Partnerët ndërkombëtarë janë lodhur nga mosveprimi i Prishtinës dhe kjo çoi në vendosjen e masave ndëshkuese nga BE vitin e kaluar,” u shpreh znj. fon Kramon.
Raportuesja e PE-së i tha BTA-së që për t’u anëtarësuar në BE, Kosova duhet të njihet si një vend i pavarur nga shtetet anëtare. Pesë prej tyre nuk e njohin pavarësinë e Kosovës.
Më tej është edhe çështja e dialogut për normalizimin e marrëdhënieve Prishtinë–Beograd.
“Do të ishte shumë më e lehtë për të gjithë nëse Kosova do të thoshte se i ka përmbushur të gjitha kërkesat dhe i plotëson të gjitha kriteret; atëherë BE-ja dhe partnerët ndërkombëtarë do të ushtrojnë presion të madh mbi Serbinë për të përmbushur pjesën e saj. Sidoqoftë, Kosova nuk po e bën këtë, gjë që e bën jashtëzakonisht të lehtë për presidentin serb Aleksandar Vuçic të thotë se nuk ka asnjë pikë që ai të investojë kapital politik nëse nuk ka interes për përparim nga ana e Kosovës,” tha raportuesja fon Kramon.
Ajo gjithashtu komentoi vendimin e Bankës Qendrore të Kosovës që transaksionet me para të bëhen në euro nga 1 shkurti dhe të ndalohet dinari. Komuniteti ndërkombëtar ka bërë thirrje për një periudhë tranzicioni ku të dy monedhat mund të përdoren, por Prishtina është kundër këtij opsioni.
“Kosova si shtet sovran ka të drejtë të vendosë se cila monedhë të përdorë, por mënyra se si u përpoq ta zbatojë atë vendim është problematike. Nuk u informuan njerëzit që do të preken për vendimin, nuk qarkulluan informacione në serbisht për vendimin dhe nuk mbajtën konsultime. E gjithë kjo ishte kundër interesit të njerëzve të rregullt,” komentoi komentoi znj. fon Kramon.
/f.s
