Sipas raporteve mjekësore që janë përgatitur për Mbretin Salman, të burgosurit politikë në Arabinë Saudite janë duke vuajtur nga të ushqyerit e keq, prerjet, mavijosjet dhe plagët nga djegiet.
Këto raporte paraqesin dëshminë e parë të dokumentuar brenda Gjykatës Mbretërore lidhur me torturat fizike ndaj të burgosurve politikë, pavarësisht se qeveria saudite ka mohuar që burrat dhe gratë e burgosura po keqtrajtohen.
Është bërë e ditur se këto raporte mjekësore do t’i dorëzohen Mbretit Salman bashkë me disa rekomandime, përfshirë faljen e mundshme të të gjithë të burgosurve apo të paktën lirimin e parakohshëm të atyre që janë duke u përballur me probleme të rënda shëndetësore.
Këto opsione janë duke u shqyrtuar si pjesë e një vlerësimi të urdhëruar nga mbreti, i cili e ka miratuar mbikëqyrjen dhe përcaktimin e gjendjes së 60 të burgosurve, në mesin e të cilëve ka shumë gra.
Qeveria e Arabisë Saudite nuk ka dhënë komente për këto raporte mjekësore, pavarësisht kërkesave nga gazetarët që të bëhet një gjë e tillë. Sidoqoftë, zyrtarët as nuk e kanë vënë në pikëpyetje autenticitetin e raporteve, shkruan “The Guardian”.
Presioni ndërkombëtar ndaj Arabisë Saudite për mbajtjen dhe trajtimin e të burgosurve politikë është rritur muajve të fundit për shkak të dyshimeve se disa gra aktiviste janë torturuar përmes shokut elektrik dhe goditjeve me kamxhik.
Besohet që kontrolli mjekësor i të burgosurve politikë është bërë në muajin janar, ndërsa raportet mjekësore, të cilat janë të klasifikuara si konfidenciale, janë përfshirë në një vlerësim të hollësishëm që përmban tri rekomandime për hapat e mëtutjeshëm që duhet të ndiqen nga udhëheqësi supreme i shtetit.
