Raporti më i ri global jep të dhëna tronditëse për trajtimin e vajzave, ku në çdo shtatë sekonda një vajzë nën 15 vjeç martohet.
Sipas organizatës ndërkombëtare “Save the Children” ky është raporti më i ri global, që sipas tyre paraqet shkallën e rrezikshmërisë që shkaktohet si pasojë e martesave të hershme të vajzave.
“Çdo shtatë sekonda, një vajzë nën 15 vjeç martohet, sipas raportit të ri global të Save the Children. Ky raport paraqet shkallën e rrezikut që shkaktohet si pasojë e martesave të hershme të vajzave dhe e mat këtë rrezik duke u bazuar në disa indikatorë si: martesat e hershme, lindjet në adoleshencë, vdekshmëria amtare, pjesëmarrja e grave në parlament, shkollimi i vajzave të mitura. Vendet në fund të indeksit dhe që kanë norma të larta të martesës së fëmijëve renditen: Nigeria, Çad, Republika Qendrore Afrikane, Mali dhe Somalia. Vendet në krye të indeksit renditen Suedia, Finlanda, Norvegjia, Holanda dhe Belgjika”, thuhet në studim.
Raporti thekson se “të detyrosh vajzat të martohen shumë herët do të thotë se ato nuk mund të shkojnë në shkollë, kanë më shumë gjasa të përballen me dhunën dhe abuzimin në familje. Ato mbeten shtatzënë para se trupat e tyre të jenë të përgatitur plotësisht dhe që mund të ketë pasoja shkatërruese për shëndetin e tyre dhe të fëmijës, si dhe janë të ekspozuara ndaj infeksioneve seksualisht të transmetueshëm, përfshirë HIV”.
Komuniteti ndërkombëtar ka premtuar për t’i dhënë fund martesës së fëmijëve deri në vitin 2030, por nëse trendi aktual vazhdon, numri i përgjithshëm i femrave të martuara në fëmijëri do të rritet nga 700 milion, që rezulton sot, në 950 milion në 2030. Sot është dita ndërkombëtare e vajzave.
