Pas publikimit të artikulli në Gazetën Shekulli të botuesit Kokëdhima, ku flitej për një raport sekret për drogën që implikonte dy drejtorë policie ka reaguar ashpër vetë Ministri Tahiri.
Ministri i Brendshëm e ka cilësuar raportin si fabrikim plot pallavra, ndërsa vetë Kokëdhimën si një “llum politik”.
“Policia ka reaguar zyrtarisht. Bëhet fjalë për një përpjekje goxha intensive për të përbaltur punën e policisë së Shtetit. Tashmë përveç SHQUP-it hyjnë edhe segmente të caktuara të medias, të cilat kanë guximin të fabrikojnë raporte, herë nga Shërbimi Informativ e herë nga partnerët, të cilat nuk ekzistojnë gjëkundi dhe synojnë përbaltjen e punës së policisë.
Gjithsesi nuk doja që këtë ditë ta shpenzoja me pallavra që është mësuar ky cikël llumi politik dhe në disa segmente të medias, ndaj të gjithë atyre që nuk përputhen me interesat politike, personale dhe shpesh herë edhe kriminale”, deklaroi Tahiri.
Tahiri i dha këto deklarata gjatë aktivitetit për çeljen e muajit antitrafik në Parkun Rinia.
“Ndaj do doja dhe juve t’ju ftoja me shumë dashamirësi të shpenzonit pak kohë për t’ju bërë me dije qytetarëve nevojën për t’u informuar me luftën që duhet të bëjmë të gjithë bashkë kundër trafikimit të qenieve njerëzore. Armiku më i madh në këtë sfidë është injoranca”, tha Tahiri./java/a.k
