Kështu thuhet në raportin e plotë të psikologes Jonida Haxhiu, paraqitur në gjykatë në lidhje me shëndetin e Ardian Fullanit.
Në raport thuhet se Fullanit i ka ikur oreksi, dhe për këtë arsye ai duhet të dëmshpërblehet me 40 milion lekë të reja nga ana e Bankës së Shqipërisë për shkarkimin nga puna.
Interesant është fakti se në raportin e psikologes ka disa shënime nëpër faqe, që tregojnë se ajo ka shkruajtur çfarë i kanë thënë, raporton Tema.
Në vijim zbardhen pjesë nga raporti psikologjik, i përbërë nga 19 faqe në total.
Pjesë nga raporti
-Paditësi është ndjerë gjithnjë i pafajshëm dhe në asnjë rast nuk kishte menduar se mund të kishte ndonjë implikim të tij në lidhje me çështjen e vjedhjes në Bankën e Shqipërisë. Në çdo moment gjatë intervistave shqetësimi kryesor, ndërsa u përgjigjet pyetjeve, ka rezultuar të jenë ngjarja e ndodhur dhe evidentimi i masave që duhej të merreshin për të mos rrezikuar stabilitetin ekonomiko-financiar të vendit. …
Ai vazhdon të shprehë keqardhje të thellë që kjo ngjarje ndodhi në institucionin që ai drejtonte, suksesit dhe mbarëvajtjes së të cilit ai i ka kushtuar pothuajse gjithë jetën e tij profesionale.
-Insiston të përsërisë faktin se ngjarje të tilla, në përmasa të tilla, kanë ndodhur dhe në shumë banka të tjera qendrore, si Banka e Anglisë, Banka e Francës e shumë banka të tjera të rëndësishme në botë, por analizimi i situatës dhe nxjerrja e përgjegjësive ka qenë krejt e ndryshme nga ajo që ndodhi në Shqipëri.
-Stresi ndikon te të gjitha organet jetësore dhe jep një sërë problemesh, si dhimbje koke, këputje fizike, lodhje etj. Z. Ardian Fullani thotë se këto simptoma e kanë shoqëruar gjithë kohën dhe vazhdojnë të jenë të pranishme në një intensitet të konsiderueshëm.
-Pagjumësia është një tjetër simptomë shoqëruese e situatave stresante. Është krejt normale që në ngjarje të rënda të përjetohen probleme të mëdha me gjumin, vështirësi për të zënë gjumë, gjumë i parehatshëm dhe ndjesi ankthi, apo edhe kur arrinte të flinte, situata që vazhdojnë të jenë prezente për shumë kohë pas ngjarjes.
-Stresi ndikon menjëherë edhe në zakonet e ushqyerjes së individit që e përjeton atë. Ai mund të shfaqet me shtim ose reduktim të oreksit. Ardian Fullani thotë se kjo situatë stresante ka sjellë reduktim domethënës të oreksit dhe mungesë totale e dëshirës për t’u kujdesur për veten.
