Shqipëria është renditur si lider rajonal në reformat e administratës publike, sipas raportit monitorues të OECD/SIGMA për vitin 2024.
Raporti vlerëson avancimet në fushat kyçe si strategjia, zhvillimi i politikave, shërbimi civil, menaxhimi i burimeve njerëzore, digitalizimi dhe menaxhimi i financave publike.
Në një event të organizuar nga Ministria e Shtetit për Administratën Publike dhe OECD/SIGMA, Ministrja Adea Pirdeni theksoi se Shqipëria ka treguar progres të rëndësishëm, duke ruajtur pozitat e forta në rajon.
“Shqipëria sot në shumë indikatorë ruan në mënyrë solide lidershipin rajonal. Më shumë se një analizë thjeshtë teknike, ky raport ngre një pasqyrë të pagënjeshtërt të progresit, por dhe të sfidave të Shqipërisë dhe është një dëshmi konkrete e pjekurisë së administratës sonë publike”, u shpreh Pirdeni.
Edhe kryeministri Edi Rama theksoi se Shqipëria po ecën me ritme të shpejta drejt përmbushjes së kritereve të BE-së dhe përmirësimit të sistemeve të administratës publike, me fokus në përdorimin e teknologjisë dhe inteligjencës artificiale për modernizimin e shërbimeve dhe prokurimeve publike.
Rama e cilësoi Shqipërinë si një shembull pozitiv në rajon për përdorimin e teknologjisë, duke vlerësuar përparimin e shërbimeve publike online. Ai theksoi se Shqipëria është një nga vendet lider në Ballkan në ofrimin e shërbimeve publike online, ku 95% e shërbimeve janë digjitalizuar duke shmangur radhët dhe mundësinë për korrupsion.
“Të qenit në mes të Evropës dhe të pasurit të bekimit të të qenit evropian, me mundësinë për t’u bërë pjesë e BE, është një e dhënë që garanton optimizmin për të ardhmen, një optimizëm të cilin zor se ua garanton dot diçka apo dikush vendeve me një të kaluar të ngjashme si e jona. Ngritja e një administrate publike të denjë për familjen e Evropës së bashkuara nuk është fjalë goje, është një ushtrim jashtëzakonisht kompleks”, u shpreh Rama.
Megjithatë, ai nënvizoi se janë ende sfida për të përmirësuar sistemet e administratës dhe legjislacionin, duke theksuar nevojën për një modernizim të thellë. Kryeministri theksoi se është e nevojshme që proceset administrative të jenë më transparente dhe të shpejta, për të luftuar korrupsionin jo vetëm me masa represive, por edhe me ndihmën e sistemeve që pengojnë praktikën e korrupsionit.
“Prokurimet Publike është absolutisht, për mua, një pikë ku mund të shihet progresi i jashtëzakonshëm. Kjo është vetëm njëra anë, por ana tjetër dhe në këndvështrimin tim, ajo më e vështira dhe më e rëndësishmja është modernizimi i gjithë sistemeve. Nëse nuk modernizohen sistemet, nuk ka shans që problematika e korrupsionit të zgjidhet vetëm me anën represive të shtetit. Duhet sistemet tona të qeverisjes, sistemet tona të administrimit të jenë të tilla që të mos e mundësojnë korrupsionin. Në prokurimet publike ne nuk jemi absolutisht të kënaqur. Jemi duke punuar për një model të Inteligjencës Artificiale dhe aty, që edhe tek prokurimet publike, si tek shërbimet publike ne të kemi në një masë shumë të madhe instrumentin teknologjik që bën procesin. Kjo do të bëjë që prokurimet të jenë shumë herë më tepër transparente, të jenë shumë më të shpejta, të krijojnë shumë më tepër mundësi për punonjësit e administratës që të merren me çështjet e tjera”, tha Rama.
