Në emisionin “Trialog” në RTSH1, i moderuar nga gazetarja Alba Alishani, analisti politik Preç Zogaj komentoi raportin e fundit të Departamentit Amerikan të Shtetit (DASH), duke e cilësuar si një dokument realist dhe paralajmërues për Shqipërinë.
Zogaj theksoi se fenomeni i pastrimit të parave është tashmë në fokusin e SHBA-së, duke përmendur praninë e DEA-s në vend dhe orientimin e ri të DASH për hetimet penale.
Ai rikujtoi vizitën e kreut të SPAK, Altin Dumani, në Departamentin e Shtetit, ku sipas tij u konfirmua se SHBA dhe SPAK do të intensifikojnë luftën jo vetëm kundër korrupsionit, por edhe ndaj krimit të organizuar dhe pastrimit të parave.
Zogaj ngriti një pyetje të fortë në studio se “A do lejojë Shqipëria që të legalizohet pastrimi i parave?”
Ai paralajmëroi se, “paratë e pista jo vetëm që dëmtojnë ekonominë dhe konkurrencën e ndershme, por krijojnë edhe bërthama kriminaliteti që rrezikojnë stabilitetin e vendit në çdo kohë.”
