Klubi i “Nantës” ka konfirmuar se trajneri aktual i ekipit, Claudio Ranieri do të largohet në fund të sezonit pas një viti në këtë ekip.
“Klubi dhe trajneri kanë vendosur të zgjidhin kontratën me anë të dakordësisë”, – u shpreh presidenti i “Nantës”, Waldemar Kita.
Ne e falenderojmë Klaudio Ranierin dhe stafin e tij për të gjithë punën që ata kanë bërë këtë sezon dhe u urojmë shumë suksese në projektet e tyre të së ardhmes”, – u shpreh Kita.
Ndarja ka qënë një sekret i hapur dhe ekipi i “Kanarinave” nuk e ka fshehur dëshirën e tyre për zëvendësimin e trajnerit me ish lojtarin e tyre, Jocelyn Gourvennec.
“Kalova momente të mira me ju. Shpresoj që ‘Nanta’ të vazhdoj progresin”, – u shpreh Ranieri.
Trajneri 66-vjeçar, i cili udhëhoqi “Leiçester Citin” në fitimin e titullit të Premier Ligës angleze në vitin 2016, do të qëndrojë për herë të fundit në stolin e “Nantës” në ndeshjen kundër “Strasburgut” ditën e enjte.
Ranieri erdhi verën që shkoi pas dorëheqjes së trajnerit portugez, Serxho Konsesao, i cili u largua në drejtim të ekipit të “Portos”. /b.d
