Pistoleta nuk është e imja. Kështu është shprehur 30-vjeçari, Ramazan Rraja para oficerëve të policisë së Durrësit, pas arrestimit në zonën e njohur si Ura e Gjoles, ku arma iu gjet në brez.
Kjo është deklarata e vetme që ai ka dhënë para grupit hetimor, i cili e akuzon atë për pjesëmarrje në atentatin ndaj ish-prokurorit Arjan Ndoja në vitin 2019, ku mbeti i vrarë shoferi Andi Maloku dhe u plagosur Landi Muharremi, i njohur si Rrumi.
Për ngjarjen, Rraja nuk ka pranuar të flasë. Ai u shpall në kërkim së bashku me disa persona të tjerë, përfshirë Plarent Dervishajn, i cili ndodhet në Dubai.
Policia tha se 30-vjeçari nuk ishte larguar në asnjë moment jashtë shtetit, por fshihej në trekëndëshin “Durrës-Lezhë-Tiranë”.
Rraja ishte në shoqërinë e Luis Konomit, personi që shihni në këtë foto të siguruar nga Tv Klan, i shpallur në kërkim nga policia e Elbasanit.
39-vjeçari i njohur dhe me emrin Elton Llozhi akuzohet si një nga personat që kërcënoi me jetë pak javë më parë biznesmenin, Eral Myftaraj për t’u tërhequr nga një tender të fituar në Bashkinë e Tiranës.
Për këtë ngjarje më herët në pranga u vunë Edmir Boçi dhe Shaqir e Algert Alcani, babë e bir.
As Konomi nuk ka pranuar të flasë para hetuesve.
/s.f
