Gazetari i rrjetit prestigjioz “Euronews”, Jack Parrock ka postuar një ditë më parë në “Twitter” një fotografi ku shfaqet përkrah Ramës, i cili e ka pritur në hyrjen e vilës qeveritare këmbëzbathur.
Parrockut i ka bërë përshtypje që Rama i ka pritur atë dhe ekipin e tij televiziv zbathur dhe me pantallona të shkurtra. ”Kjo nuk ishte një interviste e zakonshme politike. Kryeministri i Shqipërisë na priti në rezidencën e tij verore, zbathur dhe me pantallona të shkurtra. Intervista jonë u përqëndrua te potenciali i Shqipërisë për fillimin e bisedimeve të pranimit në BE. Intervista do të transmetohet në Euronews në ditët në vijim”.
Megjithatë Euronews është marrë dje gjatë gjithë edicioneve qëndrore të lajmeve me pamjen e kryeministrit shqiptar. Në rubrikën që fliste për rrjetet sociale dhe mediat, gazetarët e rrjetit europian kanë pasqyruar zhurmën që ka bërë në mediat shqiptare fotoja e Ramës zbathur.
Madje ata janë lidhur me Jack Parrock, për ta pyetur nëse është ndjerë i fyer nga mënyra sesi Rama e ka pritur, pasi kjo ishte raportuar në disa media të Shqipërisë. “S’u ndjeva aspak i fyer”, tha Parrock.
