Kryeministri, Edi Rama, deklaroi sot se vetting-u është kusht i vetëm për marrjen e një date për hapjen e negociatave Shqipëri- BE. Sipas tij, “bllokuesit e reformës po bëjnë një përbaltje të paepur kundër vendit tonë”. Nëpërmjet një statusi në rrjetin social Facebook, kreu i qeverisë ka hedhur poshtë të gjithë zërat se Bashkimi Europian nuk është dakord me çeljen e negociatave. Sipas tij, gënjeshtrat për qëndrimin e BE-së ndaj Shqipërisë vijnë nga personat që kërkojnë bllokimin e Reformës në Drejtësi, qëllimi i vetëm i së cilëve, sipas Ramës, është të çorodisin shqiptarët.
Duke cituar intervistën e ambasadores së Bashkimit Europian, Romana Vlahutin në një TV shqiptar ku është shprehur së kusht është ligji i Vettingut dhe çështjet e tjera, zgjedhjet e lira dhe të ndershme, lufta ndaj krimit të organizuar, kanë të bëjnë me prioritetet kyçe.
Statusi i Ramës
Përpjekja e bllokuesve të Reformës në Drejtësi për të çoroditur shqiptarët me gënjeshtra për qëndrimin e BE-së ndaj Shqipërisë, është e përditshme dhe përbaltja e paepur e vendit prej tyre është mbresëlënëse!
Vetting-u është bllokuar nga Gjykata Kushtetuese me kërkesë të PD-së. Ndonëse Komision i Venecias është shprehur se “vetting-u është në përputhje të plotë me kushtetutën”, bazuar në kërkesën që Kushtetueses i drejtoi Venecias për opinion, sërish Gjykata Kushtetuese ende nuk e ka hequr masën e bllokimit të ligjit të vetting-ut. Nga ana tjetër PD, pavarësisht opinionit të Venecias, kërkon shfuqizimin e ligjit të vetting-ut, në përpjekje për të mbajtur në këmbë sistemin kriminal dhe të korruptuar të drejtësisë që ajo ka krijuar.
Me. Ar
