Kryeministri Edi Rama deklaroi se kryetari i Bashkisë së Tiranës është njeri me fat, pasi ka një njeri që e kupton dhe e mbështet në projektet e tij.
Rama e bëri deklaratën gjatë fjalës në ceremoninë e përurimit të Liceut të Arteve, pas rikonstruksionit të tij. Rama ka qenë nxënës i këtij liceu dhe e konsideroi atë si një vatër të ekselencës.
Rama tha se Liceu në vite ka përsuar rrënim të vazhdueshëm dhe ka qenë jashtë vëmendjes. Ai pohoi se pas disa dekadash liceu tashmë ka një atelie me piano të reja, ndërsa projekti për rikonstruktimin e tij është ende i paplotë. Rama solli shembullin e sopranos Ermonela Jahos, e cila njihet në mbarë arenën ndërkombëtare, ndërsa tha se ajo kishte dalë nga Liceu Artistik, duke përmbushur ëndrrën e saj për të kënduar në La Scala.
“Ajka e artit shqiptar ka bërë çudira, duke dhënë provën se asgjë nuk është e pamundur për të arritur majat. Unë gjithmonë e sjell Emonela Johon si shembull për faktin se ajo e mishëron këtë fakt, që kur ishte në Lice ajo thoshte se do këndoj në ‘La Scala’. Askush nuk mund ta besonte si një mendim normal. E sjell shembullin e saj pasi është shembull se çdo ëndërr që njeriu e sheh me sy hapur është në gjendje ta realizojë kur e sheh. Ata që ja dalin kanë një vendosmëri gati-gati të natyrshme për të kaluar detin në këmbë dhe për të bërë të mundur që të injektohen me ëndrrën e tyre. Në këtë shkollë është e natyrshme që të vinë nxënës të vegjël e më të rritur me ëndrra që i shohin me sy hapur”, tha Rama.
“Ky inaugurim përkon edhe me rritjen e rrogave për mësuesit. Por ju jeni mësues që tregoni shumë përkushtim, jo vetëm se punoni me formimin e nxënësve për marrjen e njohurive të përgjithshme. Por punoni edhe me shpirtin e tyre”, tha Rama, i cili, si zakonisht, nuk i la batutat e ngacimet për të pranishmit: “Por ama, ma kini kujdes atë me dy gishta se ka gjasë të jetë një gjeni i keqkuptuar”..
d.i.
