Rama: Të enjten votojmë për çlirimin nga drejtësia e korruptuar

Kryeministri Edi Rama deklaron se të enjten parlamenti i Shqipërisë do të votojë për çlirimin e popullit dhe jo për pengmarrësit e drejtësisë.

Rama del direkt në televizion pas përpjekjeve intensive të ditës së sotme, ku fillimisht ai u takua me përfaqësues të PDIU, më pas takimi Meta-Basha, të cilat patën në mes deklaratën e fortë kërcënuese të ambasadorit amerikan Donald Lu për të gjithë deputetët që nuk votojnë pro Reformës.,

“Vija e kuqe e SHBA dhe Bashkimit Evropian ka rezultuar e pakapërcyeshme për pretendimet e Partisë Demokratike për të hequr procesin e monitorimit nga ndërkombëtarët”, tha Rama.

“Propozimi hibrid i kompromisit i paraqitur nga ndihmëssekretarja Nuland është e vetmja mundësi për konsensusin parlamentar të 21 korrikut. 140 deputetë të kuvendi të Shqipërisë janë përballë një zgjedhje të qartë: O të votojmë për pastrimin e drejtësisë, o të votojmë për të vazhduar me pengmarrjen e këtij populli nga sistemi i korruptuar i drejtësisë. Aleanca për Shqipërinë Evropiane do të votojë për çlirimin e popullit, jo për pengmarrësit. Aleanca për Shqipërinë Evropiane do të votojë për ta çuar faqebardhë vendin drejt negociatave për hyrjen në BE”.

“Nuk mund t’ia plotësojmë dot kërkesën për tu bashkuar në një front kundër SHBA-së. Vija e kuqe është vija e mbrojtjes së qytetarëve. PD ka fituar në këtë proces të gjatë të gjithë atë që i takon dhe sinqerisht e komplimentoj Lulzim Bashën për rezultatet që ka arrtitur, por PD s’mund të kërkojë e s’mund të marrë atë që nuk i takon. Kam qenë, jam dhe do të jem, deri në orën 10:00 të datës 21 korrik, për konsensus. Le të bashkojmë forcat individuale, partitë në parlament, të dyja koalicionet dhe me dy krahët lart të ngrejmë shpresën e shqiptarëve që përfaqësojmë për të votuar Reformën në Drejtësi dhe për t’u dhënë të gjithëve mesazhin se s’ka asgjë të pamundur kur të gjithë jemi bashkë”, e mbylli Rama.

d.i.