Insistimi i kryeministrit Edi Rama për dialog me studentët vazhdon prej disa ditësh. Vetëm sot, shefi i qeverisë u ka bërë thirrje 3 herë studentëve të ulen në tryezë për të diskutuar për 8 pikat, që i ka cilësuar të realizueshme, për finalizimin e tyre.
Përmes një statusi në twitter, Rama shkruan se nuk kërkon as pazar dhe as negociata, por vetëm dialog.
Shefi i qeverisë ka publikuar pankarten e një studenteje ku shkruhet: S’jemi Luli që të bëjmë pazare.
Megjithëatë, Rama shkruan se pavarësisht se studentët thonë se nuk janë Basha, ata po sillen ekzaktësisht si kryetari i PD që u mbyll në çadër dhe që në fund vetëm humbet.
“S’jeni Luli? Po atëherë pse bëni ekzaktësisht si Luli që futet në çadër e bërtet, s’dua dialog, plotëso kërkesat se s’dal nga çadra!? Ikën nga Kuvendi e bën të njëjtën gjë, plotësoji se s’vij! E pastaj në fund vetëm humbet! Kush ju kërkon pazare? Unë jo njëherë. As negociata. DIALOG.”-shkruan Rama.
Studentët vazhdojnë protestën para kryeministrisë, poshtë dritares së Ramës, edhe pse ka një rënie të numrit të pjesëmarrësve.
Ndërhyrja e PD-LSI, moti i keq dhe gatishmëria e kryeministrit për të plotësuar 8 pikat, e ka ndalur hovin e protestës, ndërsa brenda studenteve ka zëra që duan dialog.
Javanews/a.çupaj
