Një refuzim tjetër ndaj ndërkombëtarëve. Kështu e ka komentuar në darkë vonë Kryeministri Edi Rama vendimin e opozitës për të mos dhënë votën e saj në parim për ligjin e vettingut, sot paradite, në komisionin e reformës në drejtësi. Kryeministri shkruan në rrjetin e tij social se PD refuzoi projekligjin e vettingurt, që mbështetet fuqimisht nga ndërkombëtarët e BE dhe SHBA. Në fund të reagimit të tij të shkurtër Rama shkruan se pavarësisht kësaj, reforma nuk do të ndalet.
“PD refuzoi sot projektligjin e Vetingut që mbështetet nga SHBA/BE! Drafti kaloi në komision me votën e shumicës👍 #ReformanëDrejtësinukndalet”
Më herët në komisionin e posaçëm, pd përmes Bylykbashit e argumentoi mosdhënien e votës duke theksuar se ligji në fjalë, ai i vettingut ka një sërë problemesh dhe përplasjesh me ndryshimet e reja kushtetuese të bëra më 22 korrik. Madje ka qenë Bylykbashi, i cili duke e cilësuar ligjin si në shkelje me kushtetutën, ka paralajmëruar për një dërgim të mundshëm të draftit në Gjykatën Kushtetuese.
Pasdite, u mblodh gjithashtu edhe Konferenca e Kryetarëve për të diskutuar në lidhje me seancën e jadhtëzakonshme parlamentare. U vendos që ajo të mbahet pas një jave, të martën në orën 17: 00, për tu votuar kështu projekligji i vettingut, që i hap rrugë vlerësimit dhe kontrollit të gjyqtarëve dhe është pikënisje për reformë në drejtësi./java/a.k
