Kryeministri Edi Rama ka reaguar sot për përgjimet e publikuara dje nga gazeta gjermane “Bild”, të cilat i cilësoi “skenarë të PD”.
Nga foltorja e Kuvendit, kryeministri u shpreh se qëllimi i opozitës, sipas tij, është mbyllja e derës së negociatave për Shqipërinë.
“Marrja peng e Procesit zgjedhor, është një orvatje për t’i mbyllur Shqipërisë derën e negociatave. I gjithë plani, me përgjime të pahetuara, por të mbyllura në kasafortë, më pas të dërguara te partia, para se ata të dalin në Gjermani, gjetja e vendit pikërisht në Gjermani, kalendari i daljes së përgjimeve i përputhur me kalendarin e protestave, flasin vetë për këdo që dëshiron të shikojë dhe të mendojë.
Ato përgjime po e kryejnë funksionin e tyre për objektivin që janë bërë në një betejë zgjedhore ku ka qenë e instaluar e gjithë PD me në krye Bashën, deputetet dhe grupe që ushtronin presion dhe dhunë dhe çuditësisht është vendosur antena mbi shatin e PS dhe jo mbi palën tjetër. Por ç’rëndësi ka kjo, u bënë si këto, si ato, pse nuk u hetua, pse nuk u veprua, pse nuk doli një urdhër për kapje në flagrancë dhe pse shkuan te PD-ja dhe pse dolën në Gjermani dhe dolën tani dhe si shpjegohet që lajmet e Gjermanisë i pararend qimi.net i Shqipërisë”, tha Rama.
Kryeministri deklaroi se unë atë bisedë e kam bërë dhe do ta përsërisja dhe të tilla kam bërë me mijëra me të gjithë shtabet dhe koordinatorët. Ai tha se shteti do të fitojë mbi antishtetin.
g.kosovari
