Kryeministri Edi Rama shprehu shqetësimin e tij që SPAK mësyu në Universitetin Bujqësor të Tiranës si të ishte në një operacion antimafia që zhvillohet në Sicili, shkruan A2 CNN.
“Si i shpjegohet austriakëve (Universiteti Bujqësor i Vjenës, BOKU) që një forcë speciale futet në universitet dhe merr 24 masa sigurie a thua se u fut në fshatin e Corleone-s. Këto i bën prokuroria antimafia në Itali, por në një universitet, nuk e di…”, tha Rama në mbledhjen e grupit parlamentar socialist ku raportoi edhe rektori i UBT, Fatbardh Sallaku.
“Kur e pyetja për çfarë shume bëhet fjalë, rektori më tha që bëhet fjalë për 300 milionë lekë të vjetra… Kanë 2 vjet që i kanë marrë telefonin dhe nuk ia kanë kthyer. I kanë dhënë dritën jeshile për të kandiduar për rektor por telefonin nuk ia kthejnë. Nesër mund të dalë edhe ai fajtor”.
Kryeministri përsëriti edhe një herë që socialistët mbështesin drejtësinë, por nuk mund të lejojnë që të shkelen të drejtat e njeriut, duke përmendur edhe vendimin e Strasburgut për ish-drejtorin e RTSH-së Thoma Gëllçi, që e quajti të padrejtë paraburgimin e tij, para dënimit.
