Pas ardhjes nga SHBA, Rama u ka tërhequr veshin edhe deputetëve të Partisë Socialiste. Në mbledhjen e djeshme të Grupit Parlamentar, ku nuk ka pasur diskutime, Rama ka kërkuar prej deputetëve që të jenë të kujdesshëm kur flasin në publik apo miqtë sepse kritikat e tyre i kthehen qeverisë.
“Do të kërkoja të jeni të kujdesshëm kur flisni në publik, me miqtë tuaj në tavolina, kur shprehni rezerva ndaj ministrave, ne jemi të hapur të dëgjojmë problematikat tuaja në mbledhjen e grupit ku marrin pjesë dhe ministrat. Kjo duhet të marrë fund njëherë e mirë, sepse ajo që flitet në tavolina amplifikohet dhe çdo gjë adresohet në një pikë, te kryeministri dhe qeveria”, mësohet t’u ketë tërhequr vëmendjen Rama deputetëve të tij, raporton Panorama.
Edhe pse të rezervuar në media, deputetët socialistë shprehin vazhdimisht rezervat e tyre për punën e ministrave të veçantë, sidomos në komunikimet mes tyre, për të cilët deputetët janë ankuar se nuk u hapin telefonat dhe sillen në mënyrë arrogante.
Kritik kreu i qeverisë ishte edhe në lidhje me seancat parlamentare. Rama ka kërkuar pjesëmarrje të plotë të Grupit Parlamentar ditën e enjte në Parlament.
“Është e papranueshme që unë vij në seancë dhe ju mungoni. Nuk është hera e parë. Unë i kam ndaluar ministrat që të jenë jashtë shtetit dhe jashtë Tirane ditën e seancës parlamentare edhe pse nuk kanë të drejtë vote. Kurse ju mungoni, sikur të ishte një ditë pa asnjë rëndësi. Dua që ky defekt të rregullohet sepse në mbledhjen e ardhshme do të nxjerr dhe emrat e atyre që nuk duken fare në seancë”, mësohet të ketë thënë Rama gjatë fjalës së tij.
