“Edhe 20 ditë na ndajnë nga vendimarrja historike për të vendosur me votë se kë do të merrni në punë për të drejtuar vendin drejt të ardhmes”.
Kështu e nisi Komunikimin e fundit Javor kryeministri Edi Rama teksa tha se shqiptarët me të drejtë ankohen për punësimet në zyrat e shtetit pasi vendet i kanë zënë njerëz pa formim arsimor.
“Administrata e shtetit tonë është kthyer në një tepsi që ndahet mes partive në qeveri. Duhet të luftojmë me votë për t’i dhënë fund shtetit-tepsi për partitë. Duhet që 25 Qershorin ta bëjmë ditën e një kryengritje me votë të këtij sistemi” – tha Rama pasditen e së dielës.
“Mos i dëgjoni përrallat për komplot kundër LSI-së apo bashkëqeverisje me PD-në. Nuk kemi nevojë ta copëtojmë administratën sipas përqindjeve të partive, por për një bashkëqeverisje në kontratë me ju” – tha kreu i PS.
“Kë do zgjidhni kryeministër? Lulin, Petritin? Shpëtimin? Benin? Asnjëri prej këtyre nuk mund të bëhet kryeministër. Atëherë pse ta çoni votën për ta?” – tha kryeministri në Komunikimin Javor.
/b.d
***
Çdo të dielë, kryeministri Edi Rama publikon Komunikimin Javor, ku prek një temë të caktuar. Këtë herë, kreu i qeverisë ka lajmëruar për një ndryshim orari. “Komunikimi Javor” nuk do të publikohet në orën 18:00, por në 16:00 “për arsye të axhendës tejet të ngjeshur të fushatës”.
Në një postim në Facebook, Rama paralajmëron një mesazh të rëndësishëm prandaj i fton të gjithë ta ndjekin.
“Për arsye të axhendës tejet të ngjeshur të fushatës, sot Komunikimi Javor do të bëhet në 16.00. Ju lutem ndiqeni sepse ka një mesazh me rëndësi për të gjithë ju, që në 25 qershor keni në dorë fatin e një reforme të domosdoshme, të cilën pa ju nuk e ndërmarrim dot! Arsyet në ERTV pas 45 minutash” shkruan kryeministri në Facebook. /b.d
