Kryeministri i Shqipërisë, Edi Rama bëri të ditur sot investimet që po kryhen në Dibër. Në një status në Facebook Rama shprehet se Bashkia e Dibrës po punon me ritme të larta në pastrimin e kanaleve vaditëse si dhe ato kulluese.
Ai ka postuar disa foto, ku sipas tij, tregojnë ndryshimin që po bëhet me kanalet vaditëse.
“Edhe në Bashkinë e re të Dibrës po punohet me ritme të larta për suksesin e Vitit të Pastrimit të Madh të kanaleve vaditës e kullues që prej njëzet e kusur vjetësh u bllokuan nga llumi e indiferenca e shtetit, duke lënë dhjetëra mijëra hektarë tokë buke jashtë përdorimit dhe dhjetëra mijëra familje në fshat pa punë”, tha Rama.
Kryeministri shprehet se nga mbështetja që po merr bashkia e Dibrës prej qeverisë, ajo po pastron 619 km kanale ujitës e kullues prej ku do të hiqen 17 mijë m3 llumra që do të çojnë ujë në 10,500 hektarë tokë buke.
