Kryeministri i vendit Edi Rama deklaroi se miratimi i reformës në drejtësi do ta shkëpusë vendin nga periudha e tranzicionit.
Duke folur në aktivitetin rajonal për luftën kundër terrorizmit ai tha se kjo reformë qëndron mbi të gjitha reformat e tjera dhe se i jep mundësinë vendit për hapjen e negociatave të anëtarësimit në Bashkimin Evropian.
“Rruga e integrimit bëhet shpesh e mërzitshme. Kapitujt 23, 24 lidhen me drejtësinë, të drejtat themelore, ligjin dhe sigurinë. Edhe pse nuk kemi filluar zyrtarisht negociatat kemi kohë që kemi nisur rrugën e reformave. Me përmbylljen e reformës në drejtësi do bëjmë një hap de facto përpara edhe pse vendeve të tjera kanë hapur negociatat pa reformuar sistemin e drejtësisë. Këto do ishtin iluzione pa një sistem sigurie…Sfidat e fundit na bëjnë të diskutojmë rreth nevojës së sfidave të përbashkëta siç është edhe terrorizmi e ekstremizmi”, tha Rama.
Sa i takon luftës kundër terrorizmit, kryeministri vuri theksin tek forcimi i bashkëpunimit rajonal në fushën e shkëmbimit të informacioneve.
“Përvoja e dekadës së fundit ka provuar se e vetmja mënyrë për t’u mbrojtur nga terrorizmi është përgatitja për përballjen të pashmangshme me të. Ajo që mund të bëjmë ne është që të bëjmë parandalimin e shndërrimit në terroristë të individëve që kanë prirje të tilla”, tha Rama.
Kryeministri përmendi këtu planin e qeverisë për të futur në shkolla mësimin mbi fetë dhe u ndal sërish edhe tek ideja e ngritjes së një qendre rajonale me bazë në Tiranë për të luftuar ekstremizmin.
“Qendra rajonale në Shqipëri do të ishte një investim risi, jetëgjatë dhe me dobi të shumfishtë”, nënvizoi ai duke përmendur këtu edhe përparësinë e Shqipërisë, siç është toleranca fetare./a.m.
