Ministria e Jashtme greke bëri sot një deklaratë mjaft të fortë në lidhje me çështjen e shembjes së banesave të disa minoritarëve në Himarë në kuadër të projektit të bashkisë për rikualifikimin urban.
Kjo deklaratë solli edhe reagimin e Ministrisë së Jashtme Shqiptare që i cilësoi të papranueshme tonet kërcënuese të Greqisë.
Ndërkohë, kryeministri Rama i kujton Greqisë nëpërmjet një postimi në facebook se Himara është shqiptare. Fakti që sipas tij atje jetojnë edhe minoritarë grekë nuk mund ta bëjë greke.
Ai ilustron edhe një shembull konkret nga historia ndërkohë i kujton Greqisë se Athina u ka borxh shqiptarëve në historinë e saj të jashtëzakonshme.
Ja postimi i Ramës:
AMARCORD
Kjo gravurë e vjetër e Athinës e 1670 (qytet në të cilin, shkruante ende më 1925 princi grek fanariot Eugene Rizo-Rangabe, “…popullsia autoktone është edhe sot e kësaj dite kryesisht shqiptare”), na kujton, ndër të tjera se, nëse Akropoli i lashtë është ende në këmbë për lavdi të njerëzimit dhe qytetërimit, kjo i detyrohet edhe kurajos dhe vizionit të primatit shqiptar të Athinës, Gjergj Dushmanit! I cili, më 1686, negocioi me flotën veneciane të Francesco Morosinit që qyteti të mos bombardohej prej limanit të Falerës, edhe pse aty ndodhej një garnizon turk.
Një histori e tillë e një qyteti që dikur ishte sipas historianëve e dëshmive autentike, qytet kryesisht shqipfolës, nuk e bën absolutisht atë një qytet shqiptar, edhe pse shqiptarëve Athina🇬🇷 diçka u ka borxh në historinë e saj të jashtëzakonshme. Dhe, tamam po kështu, nëse Himara🇦🇱përjetoi me arqipelagët grekë dhe greqishten si “lingua franca” të Orientit, nëpërmjet shkëmbimeve detare, një bashkëjetesë të afërt e të frytshme, kjo nuk e bën atë absolutisht një krahinë greke; aq më shumë që popullsia e saj, në të gjithë aktet ndërkombëtare, për të mos folur veç për Historinë, njihet thjesht e vetëm si SHQIPTARE.
