Kryeministri ka reaguar pas deklaratës së Shoqatës së Gjyqtarëve, e cila akuzoi kreun e qeverisë për ushtrimin e “presionit” ndaj Gjykatës Kushtetuese. Në një reagim në rrjetin social X, ai hodhi poshtë pretendimet, duke thënë se prej një dekade nuk ka qenë në konflikt me trupën gjyqësore, por ka luftuar për të, duke mbështetur Reformën në Drejtësi dhe duke toleruar, sipas tij, “lajthitje” të sistemit gjyqësor që kanë cenuar të drejtat e qytetarëve.
Ai deklaroi se nuk ka ndërmend të heshtë, as në rastin kur është vetë palë në një çështje në Gjykatën Kushtetuese. Sipas tij, funksioni i kryeministrit, po rrezikon të dëmtohet në pavarësinë e tij nga vendimmarrja e një prokurori dhe një gjyqtari.
“Ose nuk e dinë kuptimin e fjalës presion, sepse nuk i kam parë të ankohen për ca të tjerë, që prej vitesh u këndojnë librin e shtëpisë njerëzve të drejtësisë, ose e dinë që kur ankohen për mua, nuk u hyn gjemb në këmbë, sepse unë jam ai që kam 10 vjet që nuk luftoj me ta, po luftoj për ta madje duke i përtypur në heshtje, si çështje të pavarësisë së shpallur botërisht me Reformën në Drejtësi, edhe jo pak “lajthitje” të dhimbshme të gjyqësorit, në dëm të lirive e të drejtave të njerëzve të këtij vendi dhe të interesave të këtij shteti.
Mirëpo gabon shumë Shoqata e Gjyqtarëve, nëse pret që unë të mbyll gojën e të mos ndaj me publikun opinionin tim, as edhe kur jam vetë palë në një gjyq kushtetues, për shkak se funksioni që mbuloj, me votat e afro 1 milionë shqiptarëve, është goditur në pavarësinë e vet nga një prokuror e një gjykatës dhe rrezikon të gjymtohet për sot e për të ardhmen në shtyllën e vet kurrizore”, deklaron kryeministri në reagimin e tij.
Më tej, kryeministri Rama kritikon kërkesën e përsëritur të Shoqatës së Gjyqtarëve për rritjen e pagave me vendim të Gjykatës Kushtetuese.
Ai tha se nuk do të qëndrojë më i heshtur, siç ndodhi sipas tij herën e parë para marrjes së vendimit, ndërsa e cilësoi kërkesën e re për rritje pagash, që sipas tij arrin deri në 1600 euro mbi pagën aktuale, si përpjekje për të marrë fonde nga buxheti i shtetit duke anashkaluar institucionet përgjegjëse.
Megjithatë, Kryeministri deklaroi se qeveria dhe shumica parlamentare janë të hapura për dialog institucional me Shoqatën e Gjyqtarëve, për të adresuar nevojat e sistemit të drejtësisë.
“Heshtja ime herën e parë, përpara se sa të merrej ai vendim befasisht i turpshëm, nuk do të përsëritet këtë herë, kur me (ri)kërkesën në fjalë, shoqata e gjyqtarëve po tenton të marrë nga buxheti i shtetit, duke anashkaluar qeverinë dhe parlamentin, një rritje të re prej plot 1600 Eurosh – po po, 1600 Euro plus pagës aktuale – të pagave të magjistratëve e të këshilltarëve të tyre.
Në ndërkohë, unë dhe qeveria e shumica parlamentare që kam nderin të udhëheq, mirëpresim krahëhapur çdo komunikim institucional me shoqatën në fjalë, për të adresuar nevojat e sfidat e drejtësisë së re, ku parimi i shenjtë i pavarësisë së gjyqësorit, duhet mbrojtur me çdo kusht jo vetëm nga ndërhyrjet e jashtme të kujtdoqoftë, përfshirë dhe mua vetë, po edhe nga krimbi i brendshëm i papërgjegjshmërisë së gjyqtarëve, i cili bren përditë besimin e popullit tek drejtësia“, tha ai.
