Shëtitorja buzë detit në sheshin Taulantia në Durrës, e njohur si zona e Vollgës, po i nënshtrohet një transformimi të plotë urbanistik.
Kryeministri Edi Rama inspektoi sot kantierin e punimeve, i shoqëruar nga kryetarja e bashkisë Emirjana Sako, duke ndarë pamje nga projekti në rrjetet sociale.
Ai u shpreh se ky investim do të shërbejë drejtpërdrejt cilësisë së ofertës turistike të qytetit dhe do të kthejë shëtitoren në një hapësirë moderne për qytetarët dhe vizitorët.
Punimet po vijojnë me ritme të shpejta dhe krahas ndërhyrjeve kryesore ka nisur edhe montimi i strukturave të pergolës, të cilat do të sigurojnë hije për pushuesit përgjatë vijës bregdetare.
Rama bëri të ditur se brenda muajit qershor ky segment i shëtitores pritet të përfundojë plotësisht, ndërsa ka sugjeruar edhe hartimin e një projekti për rregullimin e fasadave të pallateve pranë saj.
““Në kantierin e shëtitores Taulantia në Durrës vijon puna, ndërsa ka nisur edhe montimi i strukturave për ndërtimin e pergolës (strukturë me shtylla dhe trarë që krijon hije mbi shëtitore). Brenda muajit qershor, ky aks i shëtitores do të jetë i përfunduar”, shkruan Rama.
Sipas projektit shëtitorja do të kompletohet me terrene të gjelbëruara, sistem ndriçimi, korsi të posaçme për këmbësorët dhe biçikletat, si dhe kënde sportive.
Paralelisht, Bashkia e Durrësit në bashkëpunim me Fondin Shqiptar të Zhvillimit po realizon edhe rehabilitimin e hyrjes së qytetit, ku përfshihet ndërtimi i pistës së biçikletave, përmirësimi i asfaltit, ndriçimi, gjelbërimi dhe ndërhyrje në sistemin e kanalizimeve për të përballuar flukset e larta të ujërave pas përmbytjeve të fundit.
Kryeministri Rama e vlerësoi projektin si një investim me ndikim të drejtpërdrejtë në jetën urbane të qytetit.
Projekti në shëtitoren “Taulantia” financohet nga Fondi Shqiptar i Zhvillimit dhe po ndërtohet mbi projekt-idenë e studios prestigjioze ndërkombëtare Bofill Taller de Arquitectura.
